Մինչեւ նախագահական ընտրությունները սահմանադրական բարեփոխումներ իրականացնելու հարցում ՀՅԴ-ի շահագրգռվածությունը, քաղաքագետ Երվանդ Բոզոյանի համոզմամբ, համապատասխանում է Սերժ Սարգսյանի շահերին:
«Կարող են մեղադրել Դաշնակցությանը, որ դա անում է` Սերժ Սարգսյանի համար իշխանության վերարտադրությունը հեշտացնելու համար: Սերժ Սարգսյանի` նախագահության երկրորդ ժամկետից հետո նա չի կարողանա նախագահ դառնալ եւ չի էլ ցանկանա, որ Հայաստանում լինի ուժեղ նախագահ, դրա համար էլ ուզում են վերացնել այդ պաշտոնը: Դաշնակցության դիրքորոշումն այդ հարցում Սերժ Սարգսյանի շահերի հետ համընկնում է»,- ասաց քաղաքագետը:
Պարոն Բոզոյանի համոզմամբ, սահմանադրական փոփոխությունները ինչ-որ մի փուլում անհրաժեշտ են . «Դա պետք է թողնել ապագայում, մինչեւ Հայաստանում չձեւավորվի նոր իշխանություն, այդ ժամանակ հասարակությունն ու քաղաքական դաշտը պետք է քննարկեն` ինչպես անցկացնել այդ փոփոխությունները»:
Նա հակված է խորհրդարանական կառավարման համակարգի անցմանը ու վստահ է, որ այդ համակարգի ներդրմամբ Հայաստանում կուսակցությունների դերն էլ կբարձրանա. «Բայց դրանից առաջ մի շարք խնդիրներ պետք է լուծվեն, որ խորհրդարանական կառավարման համակարգի անցումը դրական ազդեցություն ունենա Հայաստանում: Խորհրդարանական համակարգի հաստատմամբ կուսակցությունների դերն էապես մեծանալու է: Հիմա կուսակցությունների նկատմամբ վստահություն չկա, որովհետեւ Հայաստանում ընտրական համակարգ չկա, ընտրությունները կեղծվում են : Որ նրանց դերը մեծանա, պետք է ամեն ինչ անենք, որ Հայաստանում ընտրական համակարգը վերականգնվի: Ընտրական համակարգի վերականգնման համար էլ պետք է ընտրական օրենսգիրքը փոխել»:
Կարդացեք նաև
Պարոն Բոզոյանը հակադարձեց նաեւ ՀՅԴ ԳՄ անդամ Արմեն Ռուստամյանին, թե սահմանադրական փոփոխությունների հայեցակարգ չկա, իսկ քաղաքական մյուս ուժերն արդեն դեմ են:
Ըստ Երվանդ Բոզոյանի. « Այդ նույն հարցադրումը կարող ենք Արմեն Ռուստամյանին անել, որովհետեւ հայեցակարգը դեռ չկա, իրենք հիմա ի՞նչ են քննարկում: Այսինքն, այդքան էլ ճիշտ չէ քննարկել մի բան, որում ավելի շատ շահագրգռված են ուրիշները, քան իրենք»:
Արփինե ՍԻՄՈՆՅԱՆ
Աստված հային փրկի դաշնակից: