Օրգանական պարարտանյութերով դժվար է մտնել հայկական շուկա ոչ այն պատճառով, որ դրանք թանկ արժեն, այլեւ, հայ գյուղացու կարծրատիպը թույլ չի տալիս ազոտական պարարտանյութերը` սելիտրան եւ այն, փոխարինել կենսահումուսով:
Այսօր «Տեսակետ» ակումբում այսպիսի կարծիք հայտնեցին «ՕՌՎԱԿՕ» հայ-նորվեգական համատեղ ձեռնարկության գործադիր տնօրեն Լուսինե Նալբանդյանը եւ «ՀՈՍԹ» ընկերության գլխավոր տնօրեն Տուրլիֆ Ուգլանդը:
Հայաստանում օրգանական պարարտանյութի արտադրությամբ զբաղվող այս ընկերությունների պատասխանատուները գտնում են, որ մեր երկրում, ի տարբերություն Չինաստանի, որտեղ, հողերը գերհագեցած են քիմիական պարարտանյութերով, գյուղատնտեսները մեծ ներուժ ունեն այս պարարտանյութերն օգտագործել եւ բարձր բերքատվություն ստանալ:
Տուրլիֆ Ուգլանդը վստահեցրեց, որ եթե մեր գյուղացին օգտագործի օրգանական այդ պարարտանյութերը, ապա 30-50 տոկոս ավելի բերքատվության աճ կունենա: Այսօր շատ գյուղացիական տնտեսությունների մոտ ցածր բերքատվությունն, ըստ նորվեգացի մասնագետի, պայմանավորված է ոչ ճիշտ պարարտանյութ օգտագործելով: Մինչդեռ օրգանական պարարտանյութերը նպաստում են, որպեսզի հողի որակը լավանա, աճեցված բերքն էկոլոգիապես մաքուր լինի եւ բարձր որակ ունենա:
Լուսինե Նալբանդյանի խոսքերով, օրգանական պարարտանյութերի համատարած կիրառումը կնպաստի, որպեսզի նվազեցվեն ագրոքիմիկատների օգտագործման հետ կապված վտանգները մարդու առողջության եւ շրջակա միջավայրի համար:
Օրգանական պարարտանյութերը ստացվում են սննդի թափոններից, անձեւորդերից եւ այլ միկրոօրգանիզմներից:
Մասնագետների ներկայացմամբ, ճիշտ է Հայաստանն ու Նորվեգիան գրեթե նույն բնակլիմայական պայմաններն ունեն եւ կենսածին պարարտանյութերի օգտագործումը մեծ արդյունքներ կապահովի, սակայն Նորվեգիայի հողատարածքներում անհամեմատ քիչ են օգտագործվել քիմիական պարարտանյութերը:
Օրգանական պարարտանյութերը ներկայումս օգտագործվում են մեր երկրի մի քանի սահմանամերձ համայնքներում:
Լուսինե ԲՈՒԴԱՂՅԱՆ
