Հարցազրույց քաղաքագետ ԱԼԵՔՍԱՆԴՐ ՄԱՐԿԱՐՈՎԻ հետ
-Հայտնի է, որ Մաքսային միությունում որոշումները, այդ թվում եւ նոր անդամների ընդունման, կայացվում են կոնսենսուսով, ու եթե ՄՄ անդամ որեւէ երկիր դեմ է մեկ այլ երկրի անդամակցմանը, պարզապես դրան դեմ է քվեարկում: Ուրեմն ինչպե՞ս հասկանալ մեզանում հաճախ հնչող այն միտքը, թե Հայաստանի անդամակցմանը դեմ են ՄՄ անդամ որոշ պետություններ: Չէ՞ որ այդ դեպքում հարցի քննարկումը միանգամից կփակվեր:
-Երբ ասվում է, թե կան Հայաստանի անդամակցմանը դեմ ՄՄ երկրներ, նկատի է առնվում Ղազախստանին ու նրա նախագահ Նազարբաեւի ադրբեջանահաճո պահվածքը: Այսինքն՝ սա բացասական ազդանշաններից մեկն է: Նազարբաեւը, ընթերցելով Ալիեւի նամակը, ցույց տվեց Ղազախստանի որոշակի տնտեսական կախվածությունը Ադրբեջանից:
Բայց, սրանով հանդերձ, ամեն ինչ չէ, որ որոշվում է միայն տնտեսական շահերով, պակաս կարեւոր չէ նաեւ քաղաքական բաղադրիչը: Իհարկե, ԵՏՄ-ն տնտեսական կառույց է, բայց կգտնե՞ք այնպիսի տնտեսական միություններ, որոնք ամբողջությամբ զերծ են քաղաքականությունից: Իհարկե՝ ոչ: Հետեւաբար ԵՏՄ-ին Հայաստանի անդամակցումը կարեւորվում է հենց քաղաքական բաղադրիչի գոյությամբ:
Կարդացեք նաև
Սակայն նազաբարեւյան պահվածքի հետ մեկտեղ հիշենք Ղազախստանի ԱԳ նախարարի թվիթերյան հայտարարությունը, ուր ասվում էր, որ մինչեւ հոկտեմբեր Հայաստանը կարող է դառնալ ԵՏՄ անդամ:
-Ի դեպ, Սերժ Սարգսյանը եւս, անդրադառնալով այդ խնդրին, ասել է. «Այնպես չէ, որ Մաքսային միության անդամները չեն ցանկանում մեր անդամակցությունը: Եթե չցանկանային, ապա ուղղակի վետո կդնեին այս խնդրի վրա»:
-Իհարկե, ամեն ինչ ասված է: Այո, եթե չցանկանային, ուրեմն ամբողջ գործընթացը տեղի չէր ունենա, ու ժամանակին հստակ կասվեր, որ ձեր բոլոր ցանկությունները, փորձերը՝ դառնալ ԵՏՄ անդամ, անիմաստ են: Բայց չէ՞ որ նման բան չի ասվել, հակառակը, գործընթաց է սկսվել, եւ մենք կողմերից ստանում ենք դրական ազդանշանները, ինչն էլ մեզ թույլ է տալիս եզրահանգելու, որ ԵՏՄ-ին Հայաստանի անդամակցությունը դրական լուծում կստանա:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
