Այսօր «Էկոլուր» ակումբում, երբ Ամուլսարի հանքավայրի նախագծին ու Գնդեվազում երեկ տեղի ունեցած հանրային լսումների մասին մամուլի ասուլիս էր, ակումբ անսպասելի մտան մի խումբ գնդեվազցիներ` գյուղապետ Հայրապետ Մկրտչյանի ուղեկցությամբ:
Նրանք ասուլիսի մասնակիցներին լուռ լսեցին, իսկ երբ խոսք գնաց երեկվա հանրային լսումների մասին, եւ տեսանյութ ցուցադրվեց, ասուլիսին ներկա գնդեվազցիները վրդովվեցին: Բանն այն է, որ տեսանյութում մի խումբ բորբոքված գնդեվազցիներ էին խոսում եւ վիճում գյուղապետի հետ, դեմ արտահայտվում Ամուլսարի հանքի շահագործմանը, քանի որ նրանց ծիրանի այգիները շահագործող ընկերության «Լիդիան Ինթերնեյշնլ» ընկերության ցիանային ֆաբրիկայի եւ վարչական մասնաշենքերի կառուցմանն են զոհաբերվելու:
Ասուլիսին ներկա գնդեվազցիները չեն վստահում բնապահպանների այն հայտարարություններին, որ հանքի եւ ֆաբրիկայի շահագործումից հետո երկարաժամկետ վնասներ է պատճառվելու շրջակա միջավայրին ու բնակչության առողջությանը:
Կարդացեք նաև
Գնդեվազի գյուղապետ Հայրապետ Մկրտչյանն ասաց, որ ինքն անգամ տեղյակ չէ, թե ինչ վնասներ է հասցնելու ցիանային ֆաբրիկան, պատճառաբանելով, որ ինքը մասնագետ չէ:
Հարցին թե, ի՞նչ նպատակով է գյուղապետը մեկնել ԱՄՆ` «Լիդիան ինթերնեյշնլի» հետ, գյուղապետն ասաց. «Եղել եմ ընդեղ, տեսել եմ թե ոնց են շահագործում հանքերը, կուզեմ մեզ մոտ էլ էդպես լինի»: Մեր հարցին` ինչո՞ւ է գյուղապետը վստահ, որ ընկերությունն իսկապես անվնաս է շահագործում հանքերը, եւ Հայաստանում էլ անվնաս կաշխատի, ինչու չի վստահում բնապահպաններին, որոնք պնդում են, թե Ամուլսարի հանքի շահագործումը անդառնալի վնասներ կհասցնի, գյուղապետը ոչինչ չասաց:
«Թողեք աշխատի հանքը, գյուղապետը պիտի կարողանա համայնքը զարգացնի, գյուղացիներին պահի: «Գեոթիմը» («Լիդիան ինթերնեյշնլը «Գեոթիմի» 100% բաժնետոմսերի սեփականատերն է Ն.Բ.) մանկապարտեզ է կառուցել, երեխա չկա գնացող, մարդ չի մնացել գյուղում, աշխատատեղ չկա»,-դժգոհեց գյուղապետը, եւ նորից պնդեց, որ հանքի շահագործումը աշխատատեղերի հարցը համայնքում կլուծի:
Aravot.am-ը նաեւ հետաքրքրվեց, թե ծիրանի քանի հեկտար այգի է տրամադրվելու շահագործող ընկերությանը, որքան աշխատավարձ կստանան գյուղացիները, քանի՞ գյուղացի կկարողանա աշխատել ընկերությունում, գյուղապետն ասաց. «Չգիտեմ, թե ինչքան աշխատավարձ կստանան, ֆաբրիկային կգնա 4.5 հեկտար այգի, 28 հեկտար էլ վարչական տարածների, ենթակառուցվածքների համար»: 28 հեկտար այգին մոտ 150 գյուղացիների հողատարծք է, իսկ գյուղի բնակչության թիվը 1000-ի էլ չի հասնում:
Ապա Aravot.am-ը գյուղապետից հետաքրքրվեց` արդյոք չի կարծում, որ գյուղը դատարկվելու, աշխատեղ չլինելու ու արտագաղթի համար մեղքի իր բաժինն ունի կառավարությունը: Մեր այս հարցը գյուղապետը փորձեց շրջանցել, մի քանի անգամ կրկնեցինք մեր հարցը, գյուղապետն ի վերջո պատասխանեց, եւ արտագաղթի համար մեղադրեց մեզ` լրագրողներին, ու բնապահպաններին:
«Դուք հանրապետակա՞ն եք»,-Aravot.am-ի այս հարցին Գնդեվազի գյուղապետն այսպես պատասխանեց` «Ես մինչեւ գյուղապետ դառնալն էլ եմ հանրապետական էղել, էդ ի՞նչ կապ ունի»:
Նելլի ԲԱԲԱՅԱՆ
