Գերմանական մամուլը պնդում է, որ երկրի հատուկ ծառայությունները Թուրքիայի տարածքում գաղտնալսումներ սկսել են իրականացնել ոչ թե 2009-ից, ինչպես նախորդ շաբաթ բացահայտել էր Der Spiegel հանդեսը, այլ հեռավոր 1976 թվականից սկսած:
Այս մասին գրել է Մյունխենում լույս տեսնող հեղինակավոր Focus ամենշաբաթյա հանդեսը, պնդելով, թե խմբագրության տրամադրության տակ են հայտնվել գաղտնալսման իրողությունը հաստատող փաստաթղթերը: Դրանք, ըստ Focus-ի, վկայում են, որ Գերմանիայի դաշնային հետախուզական ծառայությունը՝ BND-ը, Թուրքիայի տարածքում գաղտնալսումներ իրականացնելու անմիջական թույլտվություն է ստացել երկրի կառավարությունից: Ավելին Focus-ը պնդում է, որ գաղտնալսումներ իրականացնելու որոշումը կայացրել է անձամբ այն ժամանակվա դաշնային կանցլերը՝ սոցիալ-դեմոկրատ Հելմուտ Շմիդտը:
Հարկ է նկատել, որ գերմանական հետախուզությունը Թուրքիայի տարածքում գաղտնալսումների մասին որոշումը կայացրել է այդ երկրի համար բավական բարդ պատմական մի փուլում, Կիպրոս կատարված ներխուժումից ընդամենը երկու տարի անց և չդադարող ներքաղաքական ճգնաժամի ֆոնին, որն ի վերջո հանգեցրեց 1980 թվականի ռազմական հեղաշրջմանը:
Գեւորգ Ստամբոլցյան
Կարդացեք նաև
Նյութի մանրամասները կարդացեք «Ազատություն» ռադիոկայանի կայքում
