«Այն փորձերը, որ ձեռնարկեցին մեր ոխերիմ հարեւանները, ի պատիվ մեր զինվորների՝ ի դերեւ եղան: Հուսով եմ, որ նրանք երբեւիցե չեն կարողանալու իրենց նպատակներն իրականացնել»,- այսօր «Ազդակ» մամուլի ակումբում ամփոփելով ամառային ներքաղաքական իրավիճակն`ասաց ԱԺ ՀՀԿ խմբակցության պատգամավոր Մկրտիչ Մինասյանը`դրական գնահատելով այդ իրավիճակում քաղաքական դիմադիր եւ ընդդիմադիր ուժերի համատեղ հանդես գալը:
Ադրբեջանի կողմից իրականացված դիվերսիոն գործողություններն, ըստ բանախոսի դաս էին մեր զինվորական հատվածի համար`ավելի աչալուրջ լինելու:
«Սա մեկ անգամ ևս ապացուցում է, որ մեր մեծագույն ձեռքբերումը մեր բանակն է եւ բանակի վրա ծախսերը չպիտի ափսոսալ»,- ասաց պատգամավորը`հավելելով, որ ամառը սովորաբար ավելի հանգիստ ու խաղաղ է լինում, բայց այս ամառ որոշ իրողություններ եղան աշխարհաքաղաքական տարածքում, որոնք չէին կարող չազդել քաղաքական իրավիճակի եւ իրականության վրա նաեւ Հայաստանում:
Լրագրողներից մեկի հարցին, որ առաջիկայում ԱԻՄ նախագահ Պարույր Հայրիկյանն է անգամ պատրաստվում հացադուլով պահանջել իշխանությունների հրաժարականը, Մկրտիչ Մինասյանն ասաց, որ ինչ-որ առումով այս աշխարհաքաղաքական իրավիճակում նաեւ բնական է, որ տարբեր կենտրոնների կողմից ինչ-ինչ ուժեր կամ գործիչներ ակտիվանան: Ասաց նաեւ, որ Պարույր Հայրիկյանն ինքը նաեւ իրեն է ուզում շրջանառության մեջ դնել:
Կարդացեք նաև
Այլ մանրամասները`տեսանյութում
Aravot.am-ի հստակեցնող հարցին`Հայրիկյանն ընդամենն իրե՞ն է շրջանառության մեջ դնում, թե որեւէ կենտրոնի պատվերն է կատարում, բանախոսն արձագանքեց. «Մեկը մյուսին չեն վնասում, լրացնում են»:
Նելլի ԳՐԻԳՈՐՅԱՆ
