«Ցեղակրոն» կուսակցության նախագահ Շանթ Հարությունյանի եւ նրա ընկերների գործով դատական նիստին այսօր երեք վկա հարցաքննվեց:
Վկաներից ոստիկան Վիգեն Հարությունյանի դատաքննական ու նախաքննական ցուցմունքները տարբերվում էին: Նախաքննական ցուցմունքում նա պատմել էր, որ նոյեմբերի 5-ին Շանթ Հարությունյանի ընկերներից Տերտերյանը հարվածում էր քաղաքացիական հագուստով ոստիկանին, իսկ այսօր ասաց՝ չի հարվածել, քաշքշել է:
Փաստաբան Արա Զաքարյանը հետաքրքրվեց՝ ինչո՞ւ է նախաքննական ցուցմունքում հարվածելու մասին գրել, ինչ-որ մեկի թելադրանքո՞վ էր, ոստիկանը միայն ասաց՝ ոչ:
Այսօր կային նաեւ դատարան չներկայացած վկաներ, որոնց նախաքննական ցուցմունքները դատախազ Գեւորգ Գեւորգյանի միջնորդությամբ հրապարակվեցին դատարանում:
Կարդացեք նաև
Շանթ Հարությունյանը ցուցմունքների հրապարակումից հետո միջնորդեց իրեղեն ապացույց ճանաչել իր որդու զրահաբաճկոնը՝ պնդելով, որ այն հագցրել է որդուն, որովհետեւ նախապես իմացել է, թե հանձնարարել էին իրեն ու Շահենին սպանել: Միջնորդությանը միացավ նաեւ նրա պաշտպան Ինեսա Պետրոսյանը, բայց առարկեց դատախազ Գեւորգյանը: Դատարանը որոշեց մերժել միջնորդությունը:
Շանթ Հարությունյանն էլ անվստահություն հայտնեց դատախազի նկատմամբ՝ պնդելով, որ նա չարաշահում է պաշտոնական դիրքը:
Դատավորը պահանջեց գրավոր ներկայացնել այդ միջնորդությունը:
Պարոն Հարությունյանը նաեւ հավելեց, որ պահանջում է վերաորակել իր մեղադրանքը՝ ոչ թե խուլիգանության, այլ իշխանության ներկայացուցչի նկատմամբ բռնություններ կատարելու մեղադրանք:
Արփինե ՍԻՄՈՆՅԱՆ
