Երևանի քաղաքապետարանի աշխատակազմի հանրակրթության վարչության պետ Գայանե Սողոմոնյանն այսօր քաղաքապետարանում կայացած ասուլիսում ներկայացրեց 2014-2015 ուսումնական տարվա նախապատրաստական աշխատանքների ընթացքը, ինչպես նաեւ խոսեց մանկապարտեզներին մատակարարվող սննդի որակի նկատմամբ իրականացվող վերահսկողության մասին:
Նա տեղեկացրեց, որ քաղաքապետը պահանջներ է դրել քաղաքապետարանի կոնկրետ ստորաբաժանումների վրա՝ ապահովել դպրոցների տարածքների ու բակերի պատշաճ վիճակը, լուծել խմելու ջրի, էլեկտրաէներգիայի անխափան մատակարարման խնդիրը:
Տարրական դպրոցի բոլոր աշակերտներն անպայման կստանան դասագրքեր, դրանք վճարովի կլինեն միայն լեզուների խորացված ուսուցմամբ դպրոցներում, ավելի ճիշտ՝ ծնողները գրքերը կգնեն գրախանութներից:
5-12-րդ դասարանների համար նախապես ներկայացված հայտերով, բոլորին կտրվեն դասագրքեր: Օգոստոսի 28-29-ին դասագրքերի բաշխման գործընթացը հիմնականում կավարտվի:
Կարդացեք նաև
Վարչության պետի տեղեկացմամբ, Երևանի քաղաքապետարանի ենթակայության 159 դպրոցներում 2013-2014 ուսումնական տարում սովորել է 79011 աշակերտ, որից 6858-ը ավարտել է հիմնական, 441-ը՝ միջնակարգ դպրոցը: Սովորողների առաջադիմությունը կազմել է 97%, իսկ կրթության որակը՝ 45%: Դպրոցներում դասավանդում է 6304 ուսուցիչ: Նրանցից 1190-ը ատեստավորվել է, 1221-ը՝ վերապատրաստվել:
Այսօրվա տվյալներով՝ 10500 աշակերտ է ընդունվել առաջին դասարաններ: Տիկին Սողոմոնյանի ասելով, վերջին օրերին առաջին դասարանցիների թիվը կաճի, երբ ծնողները վերադառնան արձակուրդից:
82 երեխա հաճախում է ներառական ուսուցում իրականացնող 6 մանկապարտեզ: Դպրոցներն աշխատում են նաեւ շաբաթ օրերին, մինչեւ ժամը 16-ը դպրոցներում կան հերթապահներ, որոնք ընդունում են երեխաների անձնական գործերը:
Երեւանի բյուջեի միջոցների հաշվին մանկապարտեզների եւս 7 խումբ է բացվել, որտեղ ներգրավված է 1500 երեխա: Գայանե Սողոմոնյանն ասում է, որ հերթագրվելու կարծրատիպը աստիճանաբար կոտրվում է:
Ինչ վերաբերում է «թեժ գծին», վարչության պետը հավաստիացնում է, որ քաղաքապետարանի հանրակրթության եւ վերահսկողության վարչությունները արձագանքում են օպերատիվ, անկախ նրանից, զանգը անանուն է, թե կոնկրետ հասցեատեր ունի: Տիկին Սողոմոնյանը նշեց, որ Տարոն Մարգարյանի ֆեյսբուքյան էջով ստացված ահազանգերն էլ ունենում են համապատասխան հետեւանքներ:
Գոհար ՀԱԿՈԲՅԱՆ
