«Դա արդեն խոսում է մեր իշխանությունների մեջ եղած չարության պաշարի մասին: Ես չեմ ցանկանում մասնավորեցնել ոստիկանության կամ մեկ այլ կառույցի: Հայաստանյան իշխանությունները շատ մեծ չարության պաշար ունեն եւ որեւէ մեկը, որը նրանց դեմ որեւէ քայլ է անում, ակցիա է կազմակերպում, վճռում են, որ պետք է նրան մինչեւ վերջ պատժվեն»,- Aravot.am-ի հետ զրույցում ասաց իրավապաշտպան Վարդան Հարությունյանն` անդրադառնալով Հայկ Կյուրեղյանի մեղադրանքի վերաորակավորմանը: Վերջինիս պատիժը խստացվել է` նոր՝ ոստիկանի նկատմամբ վտանգավոր բռնություն գործադրելու մեղադրանք առաջադրելով, որը նախատեսում է 5-ից 10-ը տարվա ազատազրկում:
Իր տեսակետի փայլուն օրինակներն, ըստ իրավապաշտպանի, մենք ունենք. «Մարտի մեկից սկսած բազմաթիվ մարդիկ բանտերում մնացին, հետապնդվեցին: Հայկն, այս համատեքստում, բացարձակապես օրիգինալ չէ: Նա տեղավորվում է իշխանությունների մտածողության մեջ: Իշխանությունների` իշխանության եւ պետության մասին ունեցած պատկերացումների մեջ»:
Հիշեցնենք, հունիսի 12-ին ի պաշտպանություն Շանթ Հարությունյանի եւ նրա ընկերների, դատարանի բակում բողոքի ակցիա կատարելուց հետո, Հայկ Կյուրեղյանը կալանավորվել էր` զենքի գործադրմամբ և անձի առողջությանը միջին ծանրության վնաս պատճառելով զուգորդված խուլիգանության մեղադրանքով: Մեղադրանքը նախատեսում էր 4-ից 7 տարվա ազատազրկում: Ի սկզբանե, Հայկ Կյուրեղյանը չի ընդունել իրեն առաջադրված մեղադրանքը: Հայկ Կյուրեղյանն այսօր էլ չի ընդունել նաև ոստիկանի նկատմամբ բռնություն գործադրելու մեղադրանքը։
Կարդացեք նաև
Վարդան Հարությունյանն այն համոզմանն է, որ Հայկ Կյուրեղյանի կողմից արված գործողությունն ուղղված չէր որեւէ մեկի, հատկապես ոստիկանության դեմ: «Դա, իմ համոզմամբ ընդամենը բողոքի ակցիա էր: Ուղղակի բողոքի ակցիան ուներ այդ դրսեւորումը: Նման դրսեւորումը մեզանում նորույթ է եւ հասարակությունն էլ այնքան բուռն չի արձագանքում, որքան որ պետք է արձագանքեր»:
Նելլի ԳՐԻԳՈՐՅԱՆ
