Բնապահպան Գագիկ Սուխուդյանն այսօր «Արմատ» մամուլի ակումբում անդրադառնալով Սեւանից 270 մլն խորանարդ մետր ջրառ կատարելու կառավարության որոշմանը, ասաց, որ առանց այդ էլ Սեւանի մակարդակը պաշտոնական տվյալներով իջել է 9 սմ-ով, ինչը նշանակում է, որ արդեն 108 մլն խորանարդ մետր ջրառ է կատարվել Սեւանից. «Մենք խաղում ենք Սեւանի բախտի հետ: Մենք Սեւանը դիտարկում ենք որպես ոռոգման ջրամբար: Էդպես չի կարելի»:
Սեւանի ջրի մաքրության մասին խոսելիս՝ պրն Սուխուդյանն ասաց, որ բոլոր այն գետերը, որոնք լցվում են Սեւանա լիճ, աղբատար են. «Իրենց ակունքներում դրանք սկսվում են որպես խմելու ջուր եւ ավարտվում՝ որպես կոյուղի: Միայն Արփա-Սեւան ջրանցքն է մաքուր, քանի որ այն չի մտնում գյուղերը»:
Բնապահպանի խոսքով՝ ջրի որակի վրա են ազդում նաեւ լճի ափին գործող հանքերը:
Ասուլիսի ընթացքում «Կիլիկիա» առագաստանավի նավապետ Կարեն Բալայանը նշեց, որ երբ որոշում ընդունվեց, որ Սեւանի մակարդակը պետք է բարձրանա 6 մետրով, 2012 թվականին Սեւանի թափանցիկությունը կտրուկ բարձրացավ. «Դա ճիշտ ուղի էր»: Պրն Բալայանը նշեց, որ մինչ այդ, երբ ցածր էր Սեւանի մակարդակը, ջրիմուռները բազմանում էին լճում եւ իր մտավախությունը հայտնեց , որ կրկին մակարդակը իջեցնելուց հետո ջրիմուռները կբազմանան եւ լիճը կկանգնի ճահճացման վտանգի առջեւ:
Կարդացեք նաև
Պրն Բալայանի խոսքով՝ այն պատճառաբանությունը, թե Սեւանից ջուրը վերցնում են ոռոգման նպատակով՝ հարցի ամենահեշտ լուծումն է. «Միայն սպառում են: Սակայն կա նաեւ մեկ այլ մեթոդ ոռոգման՝ կաթիլային ոռոգումը, որը նշանակում է, որ ջուրը պետք է խնայողաբար օգտագործվի: Գաղտնիք չէ, որ հիմնական ջուրը գնում է ձկնաբուծարանների համար, մնացած ջուրն էլ գնում է Արաքս: Եթե այդ մարդիկ ուզում են փող աշխատել, թող մի փոքր էլ երկրի մասին մտածեն եւ խնայողաբար օգտագործեն այդ ջուրը»:
Պրն Բալայանի խոսքերին պրն Սուխուդյանն էլ հավելեց, որ Արարատյան դաշտավայրում մեծ թափերով ձկնաբուծությունը զարգացնելն անհեթեթություն էր. «Ձկնարտադրության համար Սեւանը նպաստավոր վայր էր, սակայն այն գետերը, որոնց միջոցով կարող էինք այն զարգացնել, ՀԷԿ-երի համար են օգտագործվում, որոնք էլ վերացնում են կենդանական աշխարհը: Հիմա Սեւանում ձուկը գրեթե վերացել է: Ձուկը 1991 թվականի 36 հազար տոննայից հասել է 650 տոննայի»:
Պրն Սուխուդյանը նաեւ ասուլիսի ընթացքում անդրադարձավ Արփա-Սեւան ջրատար թունելին. «Սովետական տարիներին այն մեծ ջանքերով կառուցեցինք, սակայն այն հիմա կանգնած է: Արփա-Սեւանը Սեւանին կբերի 250 մլն խորանարդ մետր ջուր, Որոտանն էլ իր հերթին ՝ 165 մլն, սակայն այն վաճառեցինք ամերիկացիներին»:
Պրն Սուխուդյանի խոսքով՝ այն 250 մլն խորանարդ մետրը, որ պետք է թունելով գար, լցվում է Արփա գետը, եւ Արփայով գնում դեպի Նախիջեւան. «Ինչպե՞ս ենք անխնա վերաբերվում այդ ջրին, երբ այն կարող էր որոշիչ գործոն հանդիսանալ»:
Էլյա ՀՈՎՀԱՆՆԻՍՅԱՆ
