ՀՀ ԱՆ առողջապահական պետական տեսչության հիգիենայի բաժնի պետ Մարգարիտա Բաբայանը «Ազդակ» լրագրողական ակումբում անդրադառնալով ամռանը գրանցված թունավորման դեպքերին, նշեց, որ այս տարի արձանագրվել է բոտուլիզմի չորս դեպք՝ վեց տուժածով։ «Առայժմ մահ չի արձանագրվել, եթե համեմատենք անցյալ տարվա հետ, ապա անցյալ տարի արձանագրվել էր 24 դեպք՝ 40 տուժածով, որոնցից երեքը մահվան ելքով»:
Բանախոսը նշեց, որ այս տարի սնկից թունավորումների դեպքերը շատացել են. «Հատկապես Լոռվա մարզում են լինում սնկից թունավորումները։ 20 դեպք՝ 29 տուժածով, որոնց մեջ 8 դեպք գրանցվել է մինչեւ 14 տարեկան երեխաների մոտ»:
Տիկին Բաբայանը, բոտուլիզմի դեպքերից խուսափելու համար, խորհուրդ չի տալիս տնային պայմաններում պահածոներ պատրաստել, միայն խորհուրդ է տալիս դրանք սառեցված վիճակում պահել սառնարաններում. «Երբ ձմռանը պահածոն բացում են, իսկ սնունդն արդեն թունավորված է լինում, այն չի փոխում իր համը, հոտը եւ տեսքը։ Սակայն ուտելուց երկու ժամ հետո արդեն կարող է թունավորում լինել, մինչդեռ գաղտնի բոտուլիզմը կարող է մինչեւ 12 օր տեւել: Դրա համար խորհուրդ չեմ տալիս պահածոյացնել։ Կարելի է մուրաբաներ փակել, դրանց մեջ շաքարի տոկոսը 50-ից բարձր է, իսկ աղ պարունակող մթերքներում թունավորման հարուցիչները ավելի շատ են»:
Տիկին Բաբայանի խոսքով՝ այլ սննդային թունավորումների դեպքեր այս տարի չեն գրանցվել։ Բանախոսը թունավորումների քանակի նվազումը պայմանավորում է նրանով, որ հանրությունը դարձել է ավելի գրագետ։ Բանախոսը տեղեկացրեց, որ անցյալ տարիներին ավելի հաճախ էին գրանցվում ոչ հիգիենիկ պայմաններում պատրաստված կրեմային հրուշակեղենից, աղցաններից թունավորման դեպքերը։
Կարդացեք նաև
Տիկին Բաբայանը նման միջադեպերից խուսափելու համար հորդորում է հետեւել հիգիենայի պահպանման հինգ կանոններին՝ լվանալ սննդամթերքը եւ այն պարագաները, որոնք օգտագործվում են սնունդն օգտագործելիս. «Այն կերակրատեսակները, որոնք պարունակում են միս, պահպանել սառնարանում՝ 2-6 աստիճանի պայմաններում, պետք է առանձին պահպանել հում սննդամթերքը՝ եփած սննդամթերքից»:
Էլյա ՀՈՎՀԱՆՆԻՍՅԱՆ
