Օգոստոսի 20-ին Տավուշի մարզի սահմանամերձ Աչաջուր գյուղի մարզադաշտում կայացավ Վաչիկ Ղալթախչյանի 90-ամյակին նվիրված մարզական միջոցառում: Մոտ 8 ամիս առաջ կյանքից հեռացած Վաչիկ Ղալթախչյանը անցյալ դարի 50-ական թվականներին հայրենի Աչաջրում կառուցել է ֆուտբոլային մարզադաշտ, ուր տասնամյակներ շարունակ մարզական մկրտություն են ստացել Աչաջրի պատանիները, այնտեղ հանդես են եկել նաեւ ֆուտբոլի ԽՍՀՄ հավաքականի, Մոսկվայի «Սպարտակի», Թբիլիսիի «Դինամոյի», Երեւանի «Արարատի» վետերան ֆուտբոլիստները:
Վ. Ղալթախչյանի 90-ամյա հոբելյանին նվիրված միջոցառման ժամանակ մրցեցին Աչաջրի եւ Նոյեմբերյանի տարածաշրջանի վետերան ֆուտբոլիստների թիմերը: Այդ խաղին մասնակցեցին նաեւ Վաչիկ Ղալթախչյանի որդիներ՝ Աչաջրի գյուղապետ Կամո Ղալթախչյանը, վերջինիս եղբայր Անատոլի Ղալթախչյանը,Կամո Ղալթախչյանի որդին՝ Հովհաննեսը: Նոյեմբերյանցի ֆուտբոլիստները տարիքով ավելի երիտասարդ էին եւ շարժունակ, ուստի հաղթեցին 5:2 հաշվով;
Հանդիպման ավարտին Ղալթախչյան տոհմի կողմից Աչաջրի գեղատեսիլ անկյուններից մեկում ֆուտբոլիստների համար հյուրասիրություն եղավ: Այդ միջոցառմանը շուք տվեց Հայաստանի հավաքականի նախկին թեկնածու,Նոյեմբերյանի «Ազնավուր» թիմի նախկին խաղացող Շիրակ Սառիկյանի մասնակցությունը: Շ.Սառիկյանը թեեւ 15 տարի բնակվում եւ ֆուտբոլային գործունեություն է ծավալում Ավստրիայում , սակայն մշտապես հանդերձանքով եւ մարզական գույքով օգնում է իր նախկին ակումբակից ֆուտբոլիստներին:
Կարդացեք նաև
Ոսկան ՍԱՐԳՍՅԱՆ
