Մոտ մեկ ամիս առաջ Գորիսում թութը վերջացել է, սակայն երեք օրից` օգոստոսի 23-ին Սյունիքի մարզի այս քաղաքում կազմակերպվելու է թթի փառատոն: Էկոնոմիկայի նախարարության ու «Արենի» փառատոն հիմնադրամի պատասխանատուներն, այսօր, «Հայելի» ակումբում նշեցին, որ փառատոնը կրելու է «Սյունյաց ավանդույթներ» անվանումը, որի ընթացքում զբոսաշրջիկները ներկա են գտնվելու տնական պայմաններում թթից օղի թորելու, դոշաբ եւ այլ ուտեստներ պատրաստելու արարողություններին:
Էկոնոմիկայի նախարարության զբոսաշրջության վարչության պետ Մեխակ Ապրեսյանն ասաց, որ մարզերում նման փառատոների կազմակերպումը հնարավորություն է տալիս նպաստել այդ վայրերում տուրիզմի զարգացմանը, մարզի բնակչի բարեկեցությանը:
Գորիսի քաղաքապետ Վաչագան Ադունցի խոսքով, փառատոնն ինչ-ինչ պատճառներով երկու անգամ հետաձգվել է, այդ պատճառով էլ այն կազմակերպվել է թթի սեզոնի ավարտին: Թարմ թթի փոխարեն հյուրերին կմատուցվի թթի չիրը:
«Արենի» փառատոն հիմնադրամի տնօրեն Նունե Մանուկյանի խոսքերով, այսպիսի փառատոների նպատակը տուրիստական նոր արտադրանք ստեղծելն է եւ տուրփաթեթներում այն ներառելը:
Կարդացեք նաև
Ասուլիսի մասնակիցները փաստեցին, որ այսպիսի փառատոների շնորհիվ այսօր մարզերում ավելի շատ են տուրիստները լինում, քան` մայրաքաղաքում:
Մեխակ Ապրեսյանի ներկայացմամբ էլ, փառատոների դիվերսիֆիկացման արդյունքում Հայաստանում տարեցտարի տուրիզմի դինամիկ աճ ենք ունենում: Ըստ Մեխակ Ապրեսյանի, այդ են վկայում տարեցտարի ավելացող հյուրանոցներն ու հյուրատները: Ներկայումս հանրապետությունում գործում են 325 հյուրանոցային տնտեսություններ:
Լուսինե ԲՈՒԴԱՂՅԱՆ
