«Այսօր ամբողջ հայ ժողովուրդը կանգնած է, որպեսզի օգտակար լինի եզդի եղբայրներին»,- օգոստոսի 20-ին, «Պոստ սկրիպտում» մամլո ակումբում լրագրողների հետ հանդիպման ընթացքում հայտարարեց «Միդիա-Շանգալ» կազմակերպության ղեկավար Ամո Շարոյանը:
Նա նշեց, որ իրենք ստեղծել են կոմիտե, որը զբաղվում է եզդիների հարցերով, որպեսզի հետագայում այդ հարցը քննվի Հաագայի քրեական դատարանում: Նրանք պահանջելու են ճանաչել Իրաքի հյուսիսում եզդիների հանդեպ կատարված ցեղասպանությունը եւ հատուցել եզդի ժողովրդի կրած վնասները.
«Մենք կոչ ենք անում բոլորին, որպեսզի ստեղծվի Շանգալի եզդիների ինքնավար հանրապետությունը ՄԱԿ-ի խաղաղապահ ուժերի հսկողության ներքո, որպեսզի մարդիկ զգան, որ իրենք ապահովված են, որպեսզի միջազգային կազմակերպությունները երաշխիք տան, որ նրանք կարողանան ապրել: 20-րդ դարում, երբ նայում ես տարբեր կայքերը, մեր այսօրվա եզդիների ցեղասպանության նկարները, մի պահ քեզ թվում է, թե գտնվում ես Հայոց եղեռնի թանգարանում, որովհետեւ նույն նկարներն են, տարբերությունն այն է, որ այն 20-րդ դարում է կատարվել, սա` 21-րդ դարում»:
Անդրադառնալով Եզդիների միության նախագահ Ազիզ Թամոյանի հայտարարությանը, թե մուսուլմանների նպատակն է այդ տարածքում Քուրդստան ստեղծել` Ամո Շարոյանը նշեց, որ Քուրդստանը` որպես ինքնավար հանրապետություն, 2003 թվականից գոյություն ունի.
Կարդացեք նաև
«Եզդիների հետ միասին Սիրիայի քրդերը կռվում են: Այսօրվա դրությամբ, ես կարող եմ ասել, քրդերն օգնում են եզդիներին: Միանշանակ ես չեմ կարող ասել, թե քրդերը Քուրդստան ստեղծելու համար են դա արել»:
Ամի ՉԻՉԱԿՅԱՆ
