Հատված ԱՄՆ-ում բնակվող, Torquenews.com եւ Emaxhealth.com կայքերի խմբագիր ԱՐՄԵՆ ՀԱՐԵՅԱՆԻ հարցազրույցից:
-Հասանելի լինելով համացանցում՝ մենք ավելի մեծ աշխատանք ունենք անելու. հնարավորինս լայնածավալ եւ օբյեկտիվ տեղեկատվություն տարածելուն զուգընթաց պետք է միջազգային հասարակական կարծիքի վրա ազդեցություն ունենանք եւ պայքարենք թուրքական ապատեղեկատվության դեմ: Այս առումով հայկական էլեկտրոնային ԶԼՄ-ները համապատասխան աշխատանքներ իրականացնո՞ւմ են:
-Խնդիրն այստեղ օտար լեզուներով ինքնատիպ լրատվություն հասցնելն է այն խողովակներով, որով լրատվությունը հասնում է օտար ընթերցողին: Այստեղ էլ առաջընթաց կա, բայց տակավին խնդիրներ ունենք:
Օրինակ, հայկական եւ սփյուռքահայ մամուլի մեծամասնությունը չի տարածվում Google News, Bing News, Yahoo News, MGID, Taboola եւ այլ նմանատիպ համակարգերով, որոնք ամենապահանջվածներն են միջազգային հանրության շրջանակում: Կարծում եմ, որ այս առումով պարբերականները պետք է համագործակցեն տեղեկատվական տեխնոլոգիաների ոլորտի մասնագետների հետ, ովքեր նրանց կուղղորդեն, թե ինչ ճանապարհներով կարելի է տեղական տեղեկատվությունը հնարավորինս հասանելի եւ մատչելի դարձնել աշխարհում:
Կարդացեք նաև
Բացի դրանից, խնդիր կա ինֆորմացիոն հոսքն օտար լեզուներով համապատասխան երկրների ընթերցողներին հասանելի դարձնելու առումով: Մեր պարբերականների զգալի մասը տպագրվում է միայն հայերեն` լավագույն դեպքում ռուսերեն:
Թեեւ, մյուս կողմից, մեր գրեթե բոլոր ինտերնետային թերթերն ունեն իրենց Facebook-յան էջը, բայց միայն հայերեն: Պետք է նաեւ նմանատիպ էջեր` անգլերենով կամ այլ լեզուներով, որպեսզի մեր լրատվությունը մատչելի լինի նաեւ օտար ընթերցողին, ինչը շատ կարեւոր է:
-Անդրադառնանք հայ-թուրքական տեղեկատվական պատերազմներին: Որքանո՞վ ենք կարողանում հակադարձել տեղեկատվական հարձակումներին՝ հաշվի առնելով այն հանգամանքը, որ թուրքական տեղեկատվական քարոզչությունը պետականորեն ֆինանսավորվում է, իսկ մեզանում այն հասարակական խանդավառության վրա է հիմնված:
-Մենք կարծես թե ադրբեջանական մամուլից ոչ մի բանով հետ չենք մնում, ու ես կասեի` շատ տեղերում էլ երբեմն գերիշխող դիրքերում ենք` մտավոր հարթակում` չնայած այն հանգամանքին, որ այդ երկրներում ապատեղեկատվությունն ու կեղծ տեղեկատվություն ստեղծելը հովանավորվում է պետության միջոցներից:
Իսկ եթե օգտագործենք վերեւում նշված ու տակավին չօգտագործվող հնարավորությունները, ապա թերեւս մենք մի քանի մեծ քայլերով առաջ կանցնենք: Իսկ սա այնպիսի հարց է, որ նախեւառաջ դրա լուծմամբ ամեն խմբագիր պիտի հետաքրքրված ու շահագրգիռ լինի:
Թագուհի ԱՍԼԱՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
