«Բարգավաճ Հայաստան» խմբակցության անդամ, տնտեսագետ Միքայել Մելքումյանի կարծիքով՝ «ՀՀ սահմանապահ ճյուղերի մասին» օրենքի նախագիծը համատեղ քայլ է երկիրը դժվար իրավիճակից դուրս հանելու համար:
Հայրենական ապրանք արտադրողների միության նախագահ Վազգեն Սաֆարյանը գտնում է, որ սահմանամերձ գյուղերին արտոնություններ տրամադրելու հարցում ընդդիմադիր կուսակցությունները կառուցողական մոտեցում ցուցաբերեցին, ինչն իր արդյունքը տալիս է:
Ըստ նրա՝ սահմանային գյուղերին ազատ տնտեսական գոտիների կարգավիճակ տալու գաղափարը իրենց միության ծրագրում եղել է. «Լավ է, որ այս իրավիճակը թելադրեց այն, որ կառավարությունը գնում է ավելի արդյունավետ քայլերի»:
Անդրադառնալով այս օրերին քննարկվող դեպի Ռուսաստան հայկական ապրանքների արտահանմանը, Վազգեն Սաֆարյանն ասաց, որ Հայաստանը կարող է հատկապես Ռուսաստանի գինու շուկա մուտք գործել:
Կարդացեք նաև
Հարցին, թե տարիներ առաջ վրացական գինիների նկատմամբ արգելք եղավ եւ ինչո՞ւ Հայաստանը չկարողացավ գրավել այդ շուկան, պարոն Սաֆարյանն ասաց, որ այն ժամանակ դեռ պատրաստ չէինք: Միքայել Մելքումյանի խոսքերով՝ «մեր արտադրողները այսօր էլ չեն կարող ռուսական շուկա ապրանքներ արտահանել, քանի որ տնտեսական ճգնաժամից հետո դեռեւս ուշքի չեն եկել եւ դեռ վարկերի տակ են»:
Տնտեսագետը գտնում է, որ պետությունը պետք է կանգնի արտադրողի, վերամշակողի, մթերողի կողքին, ցածր տոկոսներով հարկեր տրամադրի, որպեսզի նրանք կարողանան ապրանք արտադրել եւ արտահանել. «Ռուսաստան արտահանելու համար պետք է մեր ապրանքը լինի որակյալ եւ կարողանանք համապատասխան քանակություն ապահովել»:
Վազգեն Սաֆարյանի խոսքերով՝ «բոլոր դեպքերում պետք է ջանքերը մեկտեղել եւ երկիրը դուրս բերել ստեղծված իրավիճակից»:
Միքայել Մելքումյանն էլ նշեց, որ սահմանամերձ գյուղերի բնակիչներին արտոնություններ տալու հարցը ԲՀԿ-ն քննարկել է եւ իսկապես պետք է գտնել մեխանիզմներ, որ սահմանապահ գյուղերը մնան. «Սահմանամերձ գոտում ներդրումներ կատարելը հեշտ չէ, բայց պետք է պայմաններ ստեղծենք: Այն մարդիկ, ովքեր մնացել են սահմանամերձ գոտիներում, էլ չեն գնալու: Կառավարության խնդիրն է միջավայր ստեղծել ներդրումների համար»:
Լուսինե ԲՈՒԴԱՂՅԱՆ
Լուսանկարը եւ տեսանյութը՝ «Ա1+»-ի
