«Օտարերկրացիները հետաքրքրված են հայկական խոհանոցով և սիրով են փորձում մեր ուտեստները»,- ասում է Հայ խոհարարական ավանդույթների զարգացման և պահպանման ՀԿ-ի նախագահ Սեդրակ Մամուլյանը:
Պարոն Մամուլյանն այսօր լրագրողների հետ հանդիպման ժամանակ ասաց, որ ազգային խոհանոցը նույնպես զբոսաշրջության զարգացման գործում կարևոր նշանակություն ունի, քանի որ զբոսաշրջիկներին հետաքրքրում է ոչ միայն աչքով տեսածը, այլև քիմքի արձանագրածը, որն ամենավերջինն է մոռացվում. «Հայկական ուտեստները փորձելիս անգամ իրենց յուրահատուկ խոհանոցով հայտնի ֆրանսիացի զբոսաշրջիկներն են զարմանում, թե ինչպես կարելի է, օրինակ, հավի միսն այդքան համեղ պատրաստել»,- ասում է Ս. Մամուլյանը:
Նրա խոսքով՝ թեև հայկական խոհանոցի նկատմամբ հետաքրքրությունը մեծացել է, սակայն տուրիստական գործակալություններն անուշադրության են մատնում հայկական խոհանոցը. «Երբ զբոսաշրջիկին ճաշելու են տանում, պետք է նրա կողքին զբոսավար լինի, որպեսզի հյուրին ծանոթացնի հայկական խոհանոցի առանձնահատկություններին»,- ասում է Ս. Մամուլյանը:
Ազգագրագետ Սվետլանա Պողոսյանն էլ իր հերթին նշեց, որ հատկապես վերջին տարիներին հայկական ավանդական ուտեստներն սկսել են արժևորվել, մինչդեռ մի քանի տարի առաջ վտանգ կար, որ դրանք կարող են մոռացության մատնվել. «Շատերը հասկացան, որ զբոսաշրջիկներին շատ է գրավում մեր խոհանոցը, և սկսեցին նորովի արժևորել մեր ուտեստները»,- ասում է Ս. Պողոսյանը: Նա գտնում է, որ 21-րդ դարում անհրաժեշտ է նոր շունչ տալ մեր ազգային խոհանոցին:
Կարդացեք նաև
Ս. Մամուլյանն էլ հավելեց, որ բոլոր երկրների ազգային խոհանոցներն էլ իրենց հնագույն, մոռացված ուտեստներն այժմ նոր մշակմամբ ներկայացնում են հանրությանը. «Նույն ճանապարհով նաև մենք ենք գնում»,- նշեց բանախոսը:
Սիրանուշ ՀԱՅՐԱՊԵՏՅԱՆ
