«Դիփունքը խափում ին, դիփունքս խափված ինք» կպնդեր մեր մեծն Գաբրիել Սունդուկանը
Երբ մեր երկրում որևէ ծառայություն (կապի, էլցանցերի, ջրի, փոստային և այլն) շահում են օտարերկրյա կազմակերպություններ, նրանցից մեր միակ ակնկալիքն այն է, որ նրանք բարձրացնեն ծառայության որակը, այնինչ այս օտարերկրյա կազմակերպությունների ղեկավարները միայն մի մտահոգություն ունեն` մեր երկրում ստանալ բարձր աշխատավարձ ու շահույթ, իսկ ծառայության ոչ որակն են բարձրացնում, ոչ` տեղացի աշխատակիցներին մարդավայել աշխատավարձ են տալիս: Շատ չեմ մեղադրում իրենց, որովհետև նրանք ընդօրինակում են մեր իշխանությունների վարքագիծն ու աշխատաոճը:
Տարիներ առաջ Հայաստանի փոստային ծառայությունը «շահեց» օտար մի կազմակերպություն, որի մատուցած ծառայություններից չափազանց դժգոհ է մեր հասարակությունը:
Օրեկան հազարավոր նամակներով «Ճանապարհային ոստիկանություն» ծառայությունը ծանուցում է մեր քաղաքացիներին իրենց հիմնավոր կամ անհիմն ճանապարհային խախտումների մասին: Ստույգ տեղեկացված եմ, որ «Ճանապարհային ոստիկանություն» ծառայության կողմից իրենց ծանուցումները հասցեատերերին հասցնելու ծառայության համար հայտարարված մրցույթը շահել է «Հայփոստ» օտար կազմակերպությունը, որի դիմաց «Հայփոստ»-ը պատշաճորեն վճարվում է «Ճանապարհային ոստիկանություն» ծառայության կողմից: Ենթադրվում է, որ այդ գումարների ինչ որ մասը պետք է ծառայեր նաև փոստատարների աշխատավարձերը բարձրացվելու նպատակով, այնինչ, ինչպես այսօր դժգոհում էին փոստատարները, նրանք ստանում են մաքուր 44000 դրամ աշխատավարձ:
Թե ինչպիսի ծանրաբեռնվածությամբ ու լարվածությամբ են աշխատում մարզերում և կենտրոնականում ԴԱՀԿ-ի աշխատակիցները` հսկայական գումարներ բերելով իրենց կազմակերպությանը, կվկայեն մեր քաղաքացիները, այնինչ , մասնավորապես Արագածոտնի մարզի ԴԱՀԿ-ի աշխատակիցները ստանում են ընդամենը 60000 դրամ աշխատավարձ:
Նրանց խոստացել էին սույն թվականի հուլիսից բարձրացնել աշխատավարձերը, սակայն գոնե Արագածոտնի մարզի աշխատակիցների աշխատավարձերը դեռևս չեն բարձրացվել: Այսինքն ինչպես օտար, այնպես էլ տեղի ղեկավարները հավասարապես կեղեքում ու շահագործում են իրենց աշխատակիցներին:
Ո՞ւր է մեր կառավարությունը, ո՞վ պետք է պաշտպանի մեր քաղաքացիների աշխատանքային իրավունքներն ու շահերը:
Հարգանքներով՝
Անահիտ Բախշյան
Երևանի ավագանու «Բարև Երևան»
խմբակցության անդամ
19 օգոստոսի 2014
Երևան
