Օրերս ԱԺ պատգամավորները վարչապետի եւ ՊՆ նախարարի հետ այս լարված իրավիճակում մեկնեցին Արցախ, այցելեցին մարտական դիրքեր: Պատգամավոր, նախկին վարչապետ Հրանտ Բագրատյանը գիշերել էր դիրքերում՝ շփման գծում: Aravot.am-ը պարոն Բագրատյանից հետաքրքրվեց՝ ի՞նչ տպավորություն ունեք, ինչքանո՞վ է անհանգիստ դրությունը:
«Վիճակը բարդ է։ Նախապատերազմական տագնապ կա։ Ուզում եմ հուսալ, որ այն էլ ավելի չի բարդանա»,- պատասխանեց պարոն Բագրատյանը:
Ադրբեջանի նախագահ Իլհամ Ալիեւը սոցցանցերում՝ Twitter-ում Երեւանը ջնջելու սպառնալիքներ է տեղում, Ադրբեջանի պաշտպանության նախարարությունն իր հերթին է սպառնում, որ ջնջելու է Հայաստանը, Սերժ Սարգսյանն իր հերթին է հայտարարում, որ ունենք բալիստիկ հրթիռներ, որոնք կարճ ժամանակում Ադրբեջանի ցանկացած ծաղկուն բնակավայր ավերակների կվերածեն: Մեր հարցին՝ այս սպառնալիքներն ո՞ւր են տանում, այս լարված իրավիճակում դա ավելի չի՞ թեժացնում իրավիճակը՝ պարոն Բագրատյանը պատասխանեց. «Այս սպառնալիքները լավ բան չեն։ Այդուհանդերձ դրանք հուշում են մի բան. ԼՂՀ պաշտպանական բանակը գոնե մեկ անգամ կարող է ոչնչացնել Ադրբեջանը։ Իհարկե, Ադրբեջանն էլ մի քանի անգամ մեզ կարող է ոչնչացնել։ Բայց մեկ անգամը ինչպես ասում են բավարար է։ Եվ ուրեմն առնվազն 2 հետեւություն. առկա է հավասարակշռություն (շատ նման է, ի դեպ, Հնդկաստանի եւ Պակիստանի միջեւ հավասարակշռությանը կապված Քաշմիրի հիմնախնդրի հետ. միջուկային զենքի առկայությունը երկուսի մոտ խաղաղություն է պարտադրել)։ Երկրորդ, ժամանակն է, որ Ադրբեջանը վիճակը հասկանա եւ բանակցությունների նստի ԼՂՀ-ի հետ։ Հայաստանն էլ պետք է հասկանա, որ ինքն այս ամենին շատ էլ չպետք է խառնվի»:
Մեր հարցին՝ պատերազմը վերսկսելու հավանականությունը մե՞ծ է հիմա, մենք եւ Ադրբեջանը պատրա՞ստ ենք դրան՝ Հրանտ Բագրատյանը պատասխանեց. «Հավանականություն կա։ Մեծ կամ փոքր չգիտեմ։ Սա նոր պատերազմ է լինելու։ Հրթիռների պատերազմ։ Հետեւակի, հրետանու եւ ծանր զինտեխնիկայի դերն այս անգամ պակաս կարեւոր է լինելու, քան 90-ականների սկզբներին։
Կարդացեք նաև
Հռիփսիմե ՋԵԲԵՋՅԱՆ
Լուսանկարը՝ Գագիկ Շամշյանի/www.shamshyan.com
Նադիր շահի ազգակիցներին ճանաչելը բարդ գործ չէ:Սպառնալ կամ պարծենալ:Միջուկայինն էլ է հոգնել Նադիրականներից: