«Ռուսաստանի տնտեսությունում տեղի ունեցող բացասական միտումները, զարգացման հեռանկարների առումով, միայն ու միայն ի նպաստ Հայաստանի են»,-պատասխանելով Aravot.am-ի հարցին, թե Ռուսաստանի` եվրոպական մի շարք ապրանքների վրա արգելք դնելուց հետո ռուսական ռուբլու կուրսը կրկին սրընթաց նվազում է, ինչպիսի՞ բացասական ազդեցություն կունենա մեր երկրի տնտեսության վրա ասաց, տնտեսագետ Աշոտ Եղիազարյանը:
նտեսագետը գտնում է, որ կարճաժամկետ հատվածում, իհարկե, Հայաստանը խնդիրներ կունենա եւ տնտեսական աճի անկում կնկատվի, սակայն երկարաժամկետ հատվածում կլուծվեն մեր երկրի համար մի շարք կարեւոր հիմնախնդիրներ` էներգետիկ, տրանսպորտային, արտաքին շուկաների եւ այլնի առումով:
Պարոն Եղիազարյանը նաեւ կարծում է, որ Ռուսաստանում տեղի ունեցող գործընթացների ֆոնի վրա նորից հրատապ է դառնում Եվրոպայի հետ Ասոցացման համաձայնագրի ստորագրումը:
«Անցումային փուլ է, Հայաստանը պետք է կարողանա հաղթահարել, անցումային ցանկացած փուլ էլ ցավալի է, որովհետեւ կտրվում է կապը գործընկերների հետ եւ, բնականաբար, գործընկերների հետ կապի ընդհատումը կբերի տնտեսական վիճակի վատացման: Բացասական ազդեցությունը կառաջանա տրանսֆերտների, արտաքին առեւտրի ոլորտում ներդրումների մասով եւ այլն»,-կարծում է տնտեսագետը:
Նա չի բացառում, որ ռուսական ռուբլու կուրսի նվազումը պայմանավորված է վերջին օրերին նավթի գների նվազմամբ եւ Ռուսաստանից` դոլարի տեսքով արտասահմանյան կապիտալի` արտահոսքով:
Աշոտ Եղիազարյանը սխալ է համարում այն պատկերացումը, թե «Հայաստանի համար լավ կլինի, եթե Ռուսաստանում լավ լինի». «Կարճաժամկետում, իհարկե, այդպես է: Հայաստանը կունենա լուրջ խնդիրներ, եկամուտների անկման եւ, ընդհանրապես, տնտեսական աճի ակտիվության առումով: Ես այն կարծիքին եմ ,որ ավելի երկարաժամկետում հակառակը՝ ռուսական տնտեսությունում տեղի ունեցող բացասական միտումները եւ ընդհանրապես Ռուսաստանի մեկուսացումը գլոբալ առումով, դա միայն կարող է դրական ազդեցություն ունենալ Հայաստանի համար»:
Ըստ տնտեսագետի, Ռուսաստանից ավելի շատ կառուցվածքային` էներգետիկ, տրանսպորտային կախվածություն է, որը Հայաստանը մինչեւ հիմա չի կարողանում հաղթահարել. «Ռուսաստանն, ըստ էության, ունենում է արգելակող գործոնի դեր: Ռուսական տնտեսությունից կախվածությունը նշանակում է նաեւ տեխնոլոգիական առաջընթացի բացառում: Ռուսաստանն ինքը չի տիրապետում համապատասխան տեխնոլոգիաներին, ըստ էության, Հայաստան` արեւմտյան ընկերությունների տեխնոլոգիաների մուտքի համար Ռուսաստանը կատարում է արգելակող խոչընդոտի դեր, կախվածության թուլացումը ենթադրում է նախեւառաջ ռուսական ազդեցության նվազում, որը իր հետ կբերի այլ ներդրումների աղբյուրներ, այլ տեխնոլոգիաներ, այլ կապեր, այլ հարաբերություններ, պոտենցիալ իմաստով մենք հնարավորություն ենք ստանում ինտեգրվել շատ ավելի զարգացած կառուցվածքներում, համապատասխանաբար` մենք ստանում ենք զարգացման ավելի մեծ հեռանկար»:
Ըստ պարոն Եղիազարյանի, Արեւմտյան պատժամիջոցների վերացումը Իրանի հարցում, լուրջ հեռանկարներ է բացում իրանական շուկայի համար, ինչը նույնպես հօգուտ Հայաստանի է:
Լուսինե ԲՈՒԴԱՂՅԱՆ
