«Այն, ինչ տեղի է ունենում Մերձավոր Արևելքում, Արևմուտքի երկակի քաղաքականության դրսևորում է: Այսօր եզդիների նկատմամբ ցեղասպանություն են իրականացնում այն նույն խմբավորումները, որոնք նույնը ծրագրում էին անել Քեսաբում, Սիրիայում»,-«Հայելի» ակումբում լրագրողների հետ հանդիպմանը անդրադառնալով եզդիների նկատմամբ իրականացվող ցեղասպանությանը՝ այսպիսի կարծիք հայտնեց թուրքագետ Ռուբեն Մելքոնյանը:
Նա նկատեց, որ այսօր նույն այդ խմբավորումները դարձել են Արևմուտքի համար գլխացավանք. մի կողմից Արևմուտքը զինում է իսլամիստներին, մյուս կողմից փորձում քննադատել ու ռմբակոծել: Այնուհետև թուրքագետը շարունակեց. «Թուրքիայի կողմից ծայրահեղ իսլամիստները անսահման աջակցություն են ստանում: Քեսաբ նրանք հենց Թուրքիայի աջակցությամբ էին մտել, իսլամիստները նաև բուժվում են Թուրքիայում»:
Ռուբեն Մելքոնյանը կարծում է, որ այն խմբավորումները, որոնք իրականացնում են եզդիների ցեղասպանությունը,, Թուրքիայի անսահման աջակցությունն ունեցող գրոհայիններն են:
Հարցին՝ ինչո՞վ են եզդիները խանգարում, պարոն Մելքոնյանը պատասխանեց. «Նրանք կոմպակտ բնակվող ժողովուրդ են, որ դավանում են ոչ իսլամ: Նրանց ուղղակի ասում են. կամ զոհվել կամ ընդունել իսլամ: Բայց մեծ մասը ընտրում է զոհվելը: Ուղղակի աշխարհը և հատկապես Արևմուտքը երկակի է մոտենում այս հարցին. եթե Սիրիայում նրանք ժողովրդավարներ էին, եզդիներին կոտորելու հարցում ցեղասպաններ են: Բայց ձեռագիրը նույնն է, ֆինանսավորումը նույն ուժերի կողմից է ստացվում: Երևի թե մավրը արել է իր գործը, մավրը պիտի հեռանա. իսլամիստները իրենց ծառայությունները արևմուտքին մատուցել են, էլ պետք չեն, ուստի դրանց վերացնել է պետք»:
Կարդացեք նաև
Ռուբեն Մելքոնյանը կարծում է, որ հայերը, որպես ցեղասպանություն վերապրած ազգ, պետք է անկողմնակալ ձևով քննադատեն այդ երևույթները և հնարավորության սահմաններում փորձեն անել ամեն ինչ, որ 21-րդ դարում չկրկնվի այն, ինչ կատարվել է 20-րդ դարում:
Տաթև ՀԱՐՈՒԹՅՈՒՆՅԱՆ
