Վերջին տարիներին Հայաստանում լրատվամիջոցներին դատի տալու դեպքերի ավելացումը, վերջերս էլ լրատվամիջոցներից տեղեկատվության աղբյուրի բացահայտման պահանջների կիրառումը` մեդիափորձագետները, լրատվության ոլորտի ներկայացուցիչները որակում են որպես լրատվամիջոցի ազատ գործունեության սահմանափակում, ավելին` լրատվամիջոցների վրա ճնշման մի նոր դրսեւորում: Մինչդեռ նրանք քննադատում են այս եւ մյուս բացասական երեւույթները, ՀՀ արդարադատության նորանշանակ նախարար Հովհաննես Մանուկյանն այլ կարծիքի է:
«Ոչ միայն լրատվամիջոցների դեմ են դատական վեճերը շատացել, այլ նաեւ պետության դեմ են դատական վեճերը շատ շատացել: Կյանքը փոխվել է, մարդիկ սկսել են ավելի հաճախ դիմել դատարան, դա նորմալ պրոցես է, ես այդտեղ խնդիր չեմ տեսնում: Չեմ կարծում, թե լրատվամիջոցների ազատ գործունեությունը սահմանափակող խնդիր կա այստեղ, եթե ինչ-որ մեկը փորձում է իր խնդիրը դատական կարգով լուծել կամ իր իրավունքը դատական կարգով վերականգնել, ինչո՞ւ պետք է լրատվամիջոցն իրեն վատ զգա, չէ՞որ պետությանն էլ են դատի տալիս», – պատասխանեց արդարադատության նախարարը:
Մերի ՍՈՂՈՄՈՆՅԱՆ
