Այսօր Մոսկվայի քաղաքային դատարանը որոշում է կայացրել կալանքից չազատել հայ բարերար, հայտնի գործարար Լեւոն Հայրապետյանին եւ խափանման միջոցը չփոխել: Այս մասին РИА Новости-ի հաղորդմամբ, դատարանը նաեւ թույլ չի տվել Լեւոն Հայրապետյանին ներկա չգտնվել դատական նիստերին, անկախ առողջական խնդիրներից:
Հիշեցնենք, որ նախորդ դատական նիստին Լեւոն Հայրապետյանի մասնակցությունն ապահովվել էր կալանավայրից՝ ուղիղ հեռարձակման միջոցով: Այդ դատական նիստին Հայրապետյանի առողջական վիճակը կտրուկ վատացել էր, եւ դատական նիստը հետաձգվել էր:
Լեւոն Հայրապետյանի պաշտպանն առաջարկել է 30 մլն ռուբլի գրավի դիմաց ազատ արձակել հայ գործարարին կալանավայրից, բացի այդ, մի շարք հայտնի հասարակական գործիչներ երաշխավորել են Լեւոն Հայրապետյանի համար: Լեւոն Հայրապետյանն էլ դատարանին ասել է, որ շատ վատ է իրեն զգում. «Կողքիս բժիշկ է կանգնած՝ ներարկիչը ձեռքին, որ անհրաժեշտության դեպքում ներարկում անի: Ես վստահում եմ իմ փաստաբաններին, կարծում եմ, նրանք առանց ինձ կհաղթահարեն»: Սակայն դատարանը մերժել է այդ մասով միջնորդությունը:
Կարդացեք նաև
«ԻՏԱՌ-ՏԱՍՍ»-ի փոխանցմամբ, Լեւոն Հայրապետյանի պաշտպան Հենրի Ռեզնիկն ասել է, որ այն հիվանդությունը, որով տառապում է Հայրապետյանը, կարող է սրվել էմոցիոնալ ճնշման պայմաններում եւ կարող է ծանր հետեւանքներ ունենալ Լեւոն Հայրապետյանի առողջության համար: Նա ասել է, որ Հայրապետյանը 65 տարեկան է, ունի սրտանոթային խնդիրներ, քաղցկեղ, երկու կաթված է տարել:
Բայց եւ այնպես, դատարանը որոշել է, որ դատական նիստը չի կարող անցկացվել՝ առանց Հայրապետյանի ներկայության:
Հիշեցնենք, որ Լեւոն Հայրապետյանը գտնվում է Մոսկվայի «Մոտրոսկայա տիշինա» կալանավայրում: Նա նախորդ դատական նիստի ընթացքում, չնայած առողջական խնդիրների սրմանը, հասցրել էր հայտարարել, որ քննիչ Բեսեդինը կողմնակալ վերաբերմունք ունի եւ գործարքների է ուզում գնալ: Նա ասել է, որ քննիչն իրեն առաջարկել է ստորագրել մի թուղթ՝ իր ազատ արձակման փաստաթղթի դիմաց:
Պատրաստեց՝ Հռիփսիմե ՋԵԲԵՋՅԱՆԸ
