Երևանի պատմության թանգարանի նախասրահում այսօր բացվեց ՀՀ վաստակավոր ճարտարապետ Գուրգեն Մուշեղյանի ծննդյան 80-ամյակին նվիրված «Նախագծեր և իրականացումներ» խորագրով ցուցահանդեսը, որին ներկա էին նաև Երևանի քաղաքապետ Տարոն Մարգարյանը, էներգետիկայի և բնական պաշարների ու քաղաքաշինության նախարարներ Երվանդ Զախարյանն ու Նարեկ Սարգսյանը, Երևանի նախկին քաղաքապետ Մուրադ Մուրադյանը, հոբելյարի գործընկերներն ու մտերիմները, որոնք, շնորհավորելով վաստակաշատ ճարտարապետին, ընդգծեցին նրա ավանդն ու ներդրումը քաղաքաշինության գործում:
Ցուցահանդեսում ներկայացված են Գ. Մուշեղյանի կյանքի ու գործունեության մասին պատմող փաստավավերագրական նյութեր, լուսանկարներ:
Ճարտարապետության և քաղաքաշինության բնագավառում ունեցած նշանակալի ավանդի, հասարակական ակտիվ գործունեության, ինչպես նաև ծննդյան 80-ամյակի առթիվ Գ. Մուշեղյանը Հայաստանի ճարտարապետների միության կողմից պարգևատրվեց պատվո դիպլոմով և ոսկե հուշամեդալով:
Կարդացեք նաև
Ճարտարապետն էլ իր հերթին Երևանի պատմության թանգարանին նվիրեց Կ. Դեմիրճյանի անվան մարզահամերգային համալիրի, «Հրազդան» մարզադաշտի և մի քանի այլ աշխատանքների նախագծային ալբոմները:
Լրագրողների հետ զրույցում պարոն Մուշեղյանը խոսեց ճարտարապետության՝ որպես շատ պատասխանատու մի մասնագիտության մասին. «Ճարտարապետությունը միայն մի հոգու գործ չէ և իբրև քաղաքաշինություն՝ շատ է պատասխանատու, որովհետև դու հաշվետու ես ոչ միայն ներկա, այլև եկող սերունդներին. չէ՞ որ քաղաքներն ապրում են հազարամյակներ, և դու պիտի ուշադիր լինես, որ հանկարծ չփչացնես ներկադ ու անցյալդ՝ բարդություններ ստեղծելով գալիք սերունդների համար, որոնք պիտի ստեղծագործելով ուղղեն քո սխալները: Ընտանիքում էլ է այդպես. երբ մեկը փչացնում է ընտանիքի անունը, մյուսների համար շատ դժվար է դա վերականգնելը»,- ասում է վաստակաշատ ճարտարապետը:
Տեղեկացնենք նաև, որ «Նախագծեր և իրականացումներ» խորագրով ցուցահանդեսի մուտքն ազատ է և բաց կլինի մոտ մեկ ամիս:
Սիրանուշ ՀԱՅՐԱՊԵՏՅԱՆ
ՀՀ Վաստակաւոր Ճարտարապետ
Տիար Գուրգէն Մուշէղեան,
Յարգարժան Տիար Մուշէղեան,
Ձեր վաստակաշատ գործունէութիւնը եւ ծառայութիւնը Հայրենի ճարտարապետութեանը, ոչ միայն Ձեր հարազատներին, այլ նաեւ Ձեր Հայրենակիցներին եւ ծանօթներին հպարտութեան պահեր է շնորհում:
Ձեզ ցանկանում ենք քաջ առողջութիւն եւ բեղումնաւոր ազգօգուտ աշխատանքների շարունակութիւն:
Խորը յարգանքներով