«Բարեխիղճ աշխատանքիս շնորհիվ մեծ գումարներ եմ խնայել բյուջեի համար: Պետբյուջեին յոթ միլիարդ դրամի ավելացումն իմ մասնակցությամբ է եղել, ինչը քննիչները նկատել չեն ցանկանում»,-Վազգեն Խաչիկյանի եւ 12 ամբաստանյալների նկատմամբ հարուցված քրեական գործի դատաքննության ընթացքում իր ցուցմունքում նշեց գործով ամբաստանյալ, ՀՀ աշխատանքի և սոցիալական հարցերի նախարարության սոցիալական ապահովության պետական ծառայության տեղեկատվական համակարգերի և վերլուծության վարչության սոցիալական ապահովագրության ծրագրերի տվյալների մշակման բաժնի նախկին պետ Վահագն Խաչատրյանը:
Նշենք, որ ամբաստանյալ Վահագն Խաչատրյանի պաշտպանը միջնորդեց իր պաշտպանյալին ևս մեկ անգամ հարցաքննել, ինչը դատարանը բավարարեց: Վահագն Խաչատրյանն իր ցուցմունքում նշեց, որ իրեն առաջադրված մեղադրանքներում իրեն մեղավոր չի ճանաչում, քանի որ ինքն ընդամենը կատարել է իր աշխատանքային պարտականությունները, իր վերադասի` Վազգեն Խաչիկյանի կողմից առաջ քաշված՝ գրավոր կամ բանավոր կարգադրությունները ու շարունակեց. «Տեսնելով, թե իմ վերադասն ինչպես ներկայացավ, ցանկություն հայտնեցի ցուցմունք տալ: Նախ ասեմ, որ ինձ ներկայացված տեղեկատվության մեջ ես չէի կարող տեսնել դեպոնենտներում ինչ թվեր են առկա, քանի որ դրանք մեծ մասամբ զրոյացված էին»:
Փաստաբան Հովիկ Արսենյանի հարցին, թե ծածկագիրը տրամադրելու համար ի՞նչ փաստաթղթեր պետք է տրամադրվեին, ամբաստանյալը պատասխանեց, որ իր համար կարևոր էր այն, որ լիներ կենսաթոշակային վարչության եզրակացությունը, որը մակագրված էր վերադաս մարմնի կողմից:
Ամբաստանյալ Աշոտ Աբրահամյանի պաշտպանը` Լիպարիտ Սիմոնյանը, ներկայացրեց Աշոտ Աբրահամյանին՝ ՀՀ նախագահի ու վարչապետի կողմից տրված շնորհակալագրերը՝ ԼՂՀ մարտական գործողություններին մասնակցելու համար:
Կարդացեք նաև
Այնուհետև դատարանը գնաց խորհրդակցական սենյակ՝ քննարկելու Լիպարիտ Սիմոնյանի կողմից ներկայացված միջնորդությունը Աշոտ Աբրահամյանի հիվանդությունների մասին, այն մասին, արդյոք Աշոտ Աբրահամյանն այդ հիվանդությունների պայմաններում կարո՞ղ է մնալ կալանավայրում, թե՝ ոչ:
Խորհրդակցական սենյակից վերադառնալով՝ դատարանը որոշեց մերժել միջնորդությունը: Դատական նիստը հետաձգվեց:
Տաթև ՀԱՐՈՒԹՅՈՒՆՅԱՆ
