Ինչպես արդեն տեղեկացրել ենք, շարունակվում է Վազգեն Խաչիկյանի եւ 12 ամբաստանյալների նկատմամբ հարուցված քրեական գործի դատաքննությունը՝ դատավոր Արշակ Վարդանյանի նախագահությամբ: Վազգեն Խաչիկյանը հրաժարվեց ցուցմունք տալ, ու հայտարարեց, թե հետո կասի՝ մեղավոր է, թե՝ ոչ: Դատարանում ընթերցվեց Խաչիկյանի նախաքննական ցուցմունքը, որը դժվարընթեռնելի էր. ձեռագիրը չէր հասկացվում, նախագահող դատավորն էլ նշեց, թե առանձնապես ցուցմունք չի էլ տվել:
Պաշտպան Աննա Ջուվանովան միջնորդությամբ հանդես եկավ, որ իր պաշտպանյալներ Բագրատ Մուրադյանն ու Արմեն Խաչատրյանը ցուցմունք տան:
Ամբաստանյալ Բագրատ Մուրադյանը նշեց, որ ամբաստանյալ Վիգեն Գևորգյանին երբեք չի ճանաչել: Այնուհետև ասաց. «Նախաքննական ցուցմունք տալիս գրել եմ այն, ինչ ինձ խնդրել է բաջանաղս` Վիգենը (ՀՀ աշխատանքի և սոցիալական հարցերի նախարարության սոցիալական ապահովության պետական ծառայության տեղեկատվական համակարգերի և վերլուծության վարչության սոցիալական ապահովագրության ծրագրերի տվյալների մշակման բաժնի նախկին պետ,-Տ.Հ.)` մտածելով, որ կօգնի նրան, սակայն արդյունքում երկուսս էլ հայտնվել ենք կալանավայրում: Չեմ հասկանում` երկու տարի ինչի՞ համար եմ բերդում նստած: Ես ոչ կենսաթոշակառուի եմ ճանաչում, ոչ էլ ինչ-որ մեկին:
Ներկայացված ոչ մի գործողությունները, որոնք ինձ են վերագրված, ես չեմ արել: Մեկ անգամ միայն վճարման ծառայությունից գնացել, գումար եմ վերցրել ու վերջ: Ոչ մի տեղից, ոչ մի գումար իմ գրպանը չի գնացել ու չեմ հասկանում, թե ինչու եմ երկու տարի նստած: Duduk ֆայլի ցուցակում ոչ մի կենսաթոշակառու ինձ ծանոթ չէ: Ես զուտ Վահագին օգնելու համար եմ գրել, քննիչը ոնց թելադրել է, այդպես էլ գրել եմ: Ես չեմ իմացել՝ ինչ գումար է եղել, ինչի համար է եղել: Նախաքննական իմ ցուցմունքում գրված է, թե մի քանի անգամ գնացել եմ վճարման ծառայություն, բայց եթե մի քանի անգամ գնացած լինեի, Վիգենին կճանաչեի»:
Կարդացեք նաև
Ամբաստանյալ Արմեն Խաչատրյանը՝ Վահագ Խաչատրյանի քրոջ ամուսինը, ցուցմունքում նշեց, որ իր նախաքննական ցուցմունքը ինքը տվել է հոգեբանական ճնշման ազդեցության տակ, իրենք թուղթ չեն էլ ուղարկել, գնացել է ցուցմունք տալու Վահագ Խաչատրյանի խնդրանքով:
Ամբաստանյալ Վիգեն Գևորգյանի պաշտպանը միջնորդություն ներկայացրեց քննության առնել այն հանգամանքը, որ իր պաշտպանյալը դատաքննական ցուցմունքում նշել էր, որ իրեն մեղադրանք է առաջադրվել այն ժամանակաշրջանի մասով, երբ ինքը հանրապետությունում չի եղել: Ուստի պաշտպանը միջնորդեց ՔԿՀ պետի թույլտվությամբ դատարանին ներկայացնել Գևորգյանի անձնագիրը և ստուգել այդ հանգամանքը:
Նշենք նաև, որ նախագահող դատավորը տեղեկացրեց, որ հայտնի duduk ֆայլում Արմենի և Բագրատի անուններն են նշված, որոնց դիմաց մի շարք թոշակառուների անուններ են գրանցված: Արմեն Խաչատրյանը, սակայն, կասկածեց, թե այդ Արմենը ինքը կարող է լինել:
Տաթև ՀԱՐՈՒԹՅՈՒՆՅԱՆ
