Սպասվում են նաեւ պատիժներ
Առաջիկայում, հավանաբար, ականատեսները կլինենք այն բանի, թե ինչ պատիժներ է կիրառում վարչապետ Հովիկ Աբրահամյանը իր խոսքն անտեսած նախարարների նկատմամբ: Իր վարչապետության կարճ ընթացքում Հովիկ Աբրահամյանը բավական հաճախ եղավ մարզերում` նախարարների ուղեկցությամբ: Տեղերում` համայնքների ղեկավարների հետ հանդիպումների ժամանակ, «Առավոտի» ունեցած տեղեկություններով, բավականին բաց խոսակցություններ են եղել առկա խնդիրների, դրանց լուծման առաջնահերթությունների եւ տարբերակների մասին:
Պատկան ոլորտների նախարարները հենց տեղերում համապատասխան հանձնարարականներ են ստացել: Բայց, վերադառնալով մայրաքաղաք, ինչ-ինչ պատճառներով այդքան էլ հետամուտ չեն եղել վարչապետի հանձնարարականները կյանքի կոչելուն: Դա, բնականաբար, դուր չի եկել Հովիկ Աբրահամյանին, ու մեր տեղեկություններով՝ առաջիկայում մի շարք տարբեր պատժամիջոցներ կկիրառվեն, նկատողություններ կհայտարարվեն սեփական պարտականություններում թերացած նախարարների նկատմամբ:
Խիստ տույժեր են սպառնում մշակութային օջախները եւ հանրային օգտագործման այլ տարածքները օտարած պաշտոնյաներին: Նախարարների հետ ձեռք բերված պայմանավորվածությունների արդյունքների վերաբերյալ տեղեկություններն, ասում են, վարչապետը ճշտում է առաջին ձեռքից` հենց համայնքապետերից: Հովիկ Աբրահամյանը ընտրական շրջաններում ՀՀԿ-ում քանիցս զբաղեցրել է ընտրական շտաբի պետի պաշտոնն ու անմիջական կապի մեջ է գրեթե բոլոր համայնքապետերի հետ, քանզի նրանք հիմնականում ՀՀԿ-ից են:
Կարդացեք նաև
Հովիկ Աբրահամյանն արգելել է պաշտոնավարության 100 օրվա առիթով մամուլի ասուլիսների անցկացումը եւ հանձնարարել է այլեւս եռամսյակը մեկ հանրությանը ներկայացնել իրենց կատարած աշխատանքների արդյունքները: Նախարարները պետք է դուրս գան «սենյակային բույսի» կարգավիճակից: Եռամսյա ամփոփիչ ասուլիսները, ընդ որում, այլեւս անցկացվելու են յուրաքանչյուր ոլորտին բնորոշ միջավայրում:
Հետաքրքիր է, ասենք, սպորտի նախարարն իր առաջին ամփոփիչ ասուլիսը ռինգո՞ւմ կանցկացնի, թե՞ ֆուտբոլի դաշտում: Կամ ո՞ր քրեակատարողական հիմնարկում կանցկացնի իր առաջին եռամսյա ամփոփիչ ասուլիսն արդարադատության նախարարը: Իսկ թե ո՞ր հանքարդյունաբերողին նախապատվություն կտա Երվանդ Զախարյանը` նույնքան հետաքրքիր եւ էական կլինի:
Նախարարներին եւս մեկ էական «նորամուծություն է սպառնում»`
չթաքնվել մամուլի խոսնակների ետեւում եւ վերացնել լրատվամիջոցների ու լրագրողների հետ ընտրողաբար շփվելու պրակտիկան: Նախարարները, հավանաբար, սեփական հասարակական իմիջի ձեւավորման շրջանակներում նաեւ ակտիվորեն կաշխատեն տվյալ ոլորտները ներկայացնող հասարակական շրջանակների հետ:
Նելլի ԳՐԻԳՈՐՅԱՆ
«Առավոտ» օրաթերթ
13.08.2014 թ
