«Ես տասը տարի դատավոր եմ աշխատել եւ սովոր եմ առաջնորդվել փաստերով: Ինչ վերաբերում է հարցին՝ ընդհանրապես սրտնեղելու տեղ չունեմ»,- այսօր, ոլորտի եռամսյա աշխատանքների ամփոփումից հետո, լրագրողների հետ զրույցում պատասխանելով սահմանադրական բարեփոխումների հանձնաժողովում իր ընդգրկված չլինելու հարցին, ասաց ՀՀ արդարադատության նախարար Հովհաննես Մանուկյանը: Լրագրողներից մեկը նախարարին հարցրեց, որ խոսակցություններ են շրջանառվում, թե ինքը շատ է սրտնեղել՝ այդ հանձնաժողովում ընդգրկված չլինելու համար, մինչդեռ նախկին նախարար Հրայր Թովմասյանն ընդգրկված է հանձնաժողովում ՝ վկայակոչելով «Ժողովուրդ» օրաթերթի այսօր հրապարակած լուրն այն մասին:
Հովհաննես Մանուկյանը հավելեց նաև, որ սահմանադրական բարեփոխումներն այնպիսի գործընթաց է, որից ինքը չի կարող անմասն մնալ:
Պատասխանելով ընդդեմ ՀՀ-ի ՄԻԵԴ-ի վճիռներին, նախարարն ասաց, որ, բնականաբար, այն գործերում, որտեղ Հայաստանը կպարտվի, դրանք կլինեն ուղենիշներ:
Իսկ մինչ այդ, ոլորտի եռամսյա գործունեությունն ամփոփելով, փոխնախարար Արմեն Մկրտչյանը լրագրողներին տեղեկացրել էր, որ ավտոտրանսպորտային իրավախախտումների հետ կապված խնդիրներ կան, այդ պատճառով ստեղծել է արագ արձագանքման խումբ, որն արձագանքում է տուգանքների հետ կապված բռնագանձումների հարցերին:
Կարդացեք նաև
Նախարարի տեղակալ Արտյոմ Գեղամյանը խոսեց նոտարական համակարգում կատարված եւ սպասվելիք փոփոխությունների մասին: Տեղեկացրեց, որ առաջիկայում կներդրվի «էլեկտրոնային նոտար» համակարգը, ինչը հնարավորություն կընձեռի քաղաքացիներին առանց նոտարական գրասենյակներ այցելելու եւ հերթեր կանգնելու՝ արագ լուծումներ տալ իրենց անհրաժեշտ հարցերին: Խոսեց նաեւ միջազգային ոլորտում համագործակցությունների եւ դրամաշնորհային միջոցների արդյունավետ ծախսման մասին:
Նախարարի մեկ այլ տեղակալ՝ Արման Թաթոսյանն էլ խոսեց ցմահ դատապարտյալներին առնչվող հարցերից, նոր քրեադատավարական օրենսգրքից, որում նախատեսված են պատժամիջոցների նոր տեսակներ:
Իսկ ՀՀ ԱՆ աշխատակազմի օրինականության վերահսկողության տեսչության պետ Միքայել Մինասյանն էլ ասաց, որ վերահսկողական լիազորությունների շրջանակներում 5 դատավորի նկատմամբ վարչական վարույթ է սկսվել, 7 ծառայողական քննություններ է իրականացվել, իսկ նոտարների մասով կարգապահական նկատողություններ են տրվել:
Նելլի ԳՐԻԳՈՐՅԱՆ
