«Կարենի հետ կատարվածը ցույց տվեց, որ մենք գործ ունենք այն իրողության հետ, որ Ադրբեջանը մնում է քնած մարդուն կացնահարող, մոլորված մարդուն սպանող պետություն: Այդպիսի պետությունների հետ բանակցություններ չեն լինում»,-Aravot.am-ի հարցին՝ ինչպե՞ս կգնահատի գերեւարված չինարեցի Կարեն Պետրոսյանի սպանությունն Ադրբեջանում և Սոչիում Սերժ Սարգսյանի հարցին ի պատասխան՝ Իլհամ Ալիևի այն արդարացմանը, թե «Մենք չենք սպանել… դե, կարող է՝ վախեցել է, մահացել է», «Փաստարկ» ակումբում այսպես պատասխանեց «Արաբո» ջոկատի ղեկավար Մանվել Եղիազարյանը:
Ըստ նրա՝ ՀՀ ԱԳ նախարար Էդվարդ Նալբանդյանը հիմա պետք է այնպիսի աղմուկ բարձրացներ Կարենի հետ կատարվածի առնչությամբ, ինչը չի անում: Նա կարծում է, որ Կարենի նկատմամբ ադրբեջանցիների վերաբերմունքն էլ ցույց է տալիս, որ նրանք լավ ճանաչում էին Կարենին:
Այս առիթով պարոն Եղիազարյանն ասաց. «Ամեն դեպքում սա նորից ցույց է տալիս, որ Ալիևի բանդան ուզում է Ադրբեջանին ցույց տալ, որ ինքը դրության տերն է, ինքը հայերին ոչնչացնելու է: Սա արվում է իր իշխանությունը պահպանելու համար»: Մանվել Եղիազարյանը Կարենին գազանաբար սպանած գեներալի արարքը համարում է «անդաստիարակ մարդու վարքագիծ» ու Աստված կանչում, որ նրան հանդիպի մարտի դաշտում և չոքացնի, որ այդ գեներալը հասկանա, որ ժողովրդի նվիրյալին չի կարելի ոչնչացնել:
Տաթև ՀԱՐՈՒԹՅՈՒՆՅԱՆ
