Սեպտեմբերին հանրային քննարկման կդրվի ՀՀ մշակույթի նախարարության կողմից մշակված մի փաթեթ, որով մի շարք փոփոխություններ են նախատեսվում պատմամշակութային հուշարձանների պահպանության և օգտագործման մասին օրենքում: Այս մասին երեկ՝ օգոստոսի 10-ին, Ծաղկաձորի քաղաքային գրադարանում լրագրողների հետ հանդիպման ժամանակ ասաց ՀՀ մշակույթի նախարար Հասմիկ Պողոսյանը:
Օրենսդրական փոփոխություններից բացի, նախատեսվում է նաև ընդլայնել Հայաստանի պատմամշակութային հուշարձանների ցանկը, այսինքն՝ եղածներին կավելացվեն վերջին տարիներին բացահայտված հուշարձանները. «Սեպտեմբերին կանցկացնենք հանրային լսումներ, որովհետև շատ կարևոր է, որ փոփոխությունների այս փաթեթում բացթողումներ չլինեն և հետագայում դրանց անդրադառնալու հարկ չլինի:
Մեր փաթեթն արդեն պատրաստ է, տարբեր իրավաբաններ ու հասարակական կազմակերպությունների անդամներ քննարկում են այն, և սեպտեմբերին մենք դա կդնենք հանրային քննարկման, որից հետո կտեսնենք՝ ինչ ծավալի աշխատանք կա անելու, իսկ հաջորդ քայլն արդեն կլինի այն կառավարություն ներկայացնելը»,- մանրամասնեց Հ. Պողոսյանը:
Տիկին Պողոսյանն ասում է, որ մշակույթի նախարարությունը հատուկ ուշադրություն է դարձնում հուշարձաններին, որոնց հարցն ամենից շատն է մտահոգում հասարակությանը, և, թերևս, ամենաքննարկվող ու քննադատվող հարցերից մեկն է. «Օրենսդրական փոփոխություններ ենք նախատեսում պատմամշակութային հուշարձանների պահպանության և օգտագործման մասին օրենքում, որովհետև այդտեղ չկան հուշարձաններին վերաբերող հիմնական հասկացությունները, չկան հուշարձանների հիմնական դասակարգումները՝ ըստ ժամանակաշրջանի, տեսակի և այլն: Իսկ դրանք խնդիրներ են, որովհետև երբ պետք է լինում անդրադառնալ չափորոշիչներին, չունենալով դասակարգումը՝ մենք չենք կարողանում չափորոշիչներ մշակել: Եվ մինչև հիմա ցանկերը, ըստ էության, կազմված են այն պատմական արժեքների ուսումնասիրության հիման վրա, որոնք որ գոյություն ունեն»,- ասում է մշակույթի նախարարը:
Կարդացեք նաև
Նրա տեղեկացմամբ՝ հաջորդ փոփոխությունը վերաբերում է հուշարձանների օգտագործման, վերանորոգման ընթացակարգերին, մասնագետների հավատարմագրման գործընթացին, որովհետև, ինչպես նկատեց նախարարը, վերականգնող մասնագետները, ըստ էության, հավատարմագրման գործընթաց չեն անցնում, ինչը, նրա խոսքով, շատ լուրջ խնդիր է և պետք է այդ գործընթացի անցկացումն օրենքով սահմանել:
Նոր փաթեթում փոփոխություններ են նախատեսված նաև հուշարձանների տեղափոխման հետ կապված, օրինակ՝ թե ինչ պայմաններում և որ դեպքերում կարող է իրականացվել հուշարձանի տեղափոխություն:
Հ. Պողոսյանն ասում է, որ գործող օրենքով գրեթե կարգավորված չէ նաև պեղումների հարցը, օրինակ՝ թե ինչպես է տրվում թույլտվությունը, ում պետք է հանձնվեն գտածոները, ով է որոշում դրանց հետագա ճակատագիրը և այլն: Այս հարցերին ևս անդրադարձել են նոր մշակված փաթեթում:
Սիրանուշ ՀԱՅՐԱՊԵՏՅԱՆ
