«Իհարկե, շատ դրական է եւ լավ, որ ցանկացած հանդիպում կբերի իր հետ որոշակի լիցքաթափման հնարավորություն»,- «Փաստարկ» մամուլի ակումբում խոսելով Սոչիում երեկ կայացած նախագահներ Սարգսյանի, Պուտինի եւ Ալիեւի հանդիպման մասին https://www.president.kremlin.ru/news/46427, ասաց «Եվրոպական ինտեգրացիա» հասարակական կազմակերպության ղեկավար Կարեն Բեքարյանը:
Ապա անդրադառնալով հանդիպման արդեն բովանդակային մասին`ասաց. «Հերթական անգամ ականատեսն ենք լինում, որ ադրբեջանական հոխորտոցը Բաքվից գալով՝ պաշտոնական հանդիպման շատ հետաքրքիր տրանսֆորմացիա է ունենում»: Քաղաքագետը հեգնանքով արտահայտվեց Ադրբեջանի նախագահի այն հայտարարության վերաբերյալ, որ իրենք կողմնակից են հարցի խաղաղ կարգավորմանը:
Անդրադառնալով ՀՀ նախագահի այսօր հրապարակված հարցազրույցին, քաղաքագետն ասաց`ակնհայտ դարձավ, որ սեղանին Կազանի փաստաթուղթն է, որի մասին շատ է խոսվել, շատ է քննարկվել, այժմ հավելելու ոչինչ չկա:
«Սոչիում Ադրբեջանը, կարծում եմ, փորձեց դեմքը փրկել: Ավանտյուրան ձեռնարկված էր, դրա արդյունքում էական դիվիդենդներ էր կորցրել, փորձեց իրավիճակը որոշակի լիցքաթափել»,- ասաց Կարեն Բեքարյանն`Ադրբեջանի նախագահի վարքագիծը համեմատելով ֆիլմերում հայտնի իրավիճակներին, երբ մարդ իրականում խփելու փորձեր չի անում, բայց աղաղակում է`«բռնեք, բռնեք`չխփեմ»:
Կարդացեք նաև
Ամեն դեպքում, բանախոսը գովելի է համարում այն, որ ՌԴ-ի միջնորդությամբ հաջողվեց իրավիճակի որոշակի լիցքաթափման հասնել, բայց. «Չպիտի մենք միամիտ լինենք եւ Ադրբեջանի տված խոստումից ոգեւորվենք»: Նա հիշեցրեց բանակցային նախկին փուլերում ձեռքբերված պայմանավորվածությունները, որոնք բավականին բարեհաջող կերպով խախտվել են Ադրբեջանի ղեկավարության կողմից:
Այս ամեն իրադարձությունների ամենաէական տարրը, ըստ քաղաքագետի, այն էր, որ ադրբեջանական հանրության համար մեկընդմիշտ ցրվեց միֆը, որ Հայաստանն ու Ադրբեջանը միայն պաշտպանողական դիրքերում չեն եւ հարկ եղած դեպքում անհրաժեշտ հակահարված կտան:
Նելլի ԳՐԻԳՈՐՅԱՆ
