Քաղաքագետ Արամ Մանուկյանը, այսօր «Զարկերակ» մամուլի ակումբում, պատասխանելով «Առավոտի» հարցին, թե ի՞նչ տվեց Սոչիում ՀՀ-Ադրբեջան-ՌԴ նախագահների եռակողմ հանդիպումը, պատասխանեց, որ եթե հաշվի առնենք, որ հանդիպման հիմնական նպատակն այն էր, որ լայնամասշտաբ պատերազմի հնարավորությունը չեզոքացվի, ապա այդ առումով. «Կարելի է որոշակի հաջողություն արձանագրել պատերազմի կանխարգելման առումով, քանի որ կողմերը վերստին հանդես եկան հայտարարությամբ, որ իրենք կողմ են բանակցային գործընթացի շարունակմանը: Սա չի նշանակում, որ սահմանային լարվածությունը չի շարունակվելու, սակայն այս հանդիպման կարեւոր կետերից մեկն այն է, որ լայնամասշտաբ պատերազմը քիչ հավանական դարձավ»:
Նա անդրադարձավ նաեւ Ռուսաստանի դերին. «Ռուսաստանը շատ բարդ աշխարհաքաղաքական իրողությունների մեջ է, եւ այդ առումով նոր պատերազմը Հարավային Կովկասում որեւէ կերպ չի կարող շահեկան լինել պաշտոնական Մոսկվայի համար, քանի որ այդ պարագայում չէր կարող չեզոքություն պահպանել, իսկ այդ դեպքում մի կողմից ռազմավարական գործընկեր Հայաստանն է, մյուս կողմից՝ տնտեսական լուրջ հարաբերություններ ունեցող Ադրբեջանը: Այս պարագայում կողմերից որեւէ մեկին նախապատվություն տալով՝ Ռուսաստանը կորցնելու էր իր ազդեցությունը մյուս կողմի վրա: Այսինքն՝ բոլոր առումներով Ռուսաստանը կորցնելու էր պատերազմի դեպքում եւ ոչ թե շահելու»:
Մելանյա ԲԱՐՍԵՂՅԱՆ
