Այսօր Սոչիում կայացած Հայաստանի, Ռուսաստանի եւ Ադրբեջանի նախագահների եռակողմ հանդիպումն, ըստ «Կովկաս» ինստիտուտի փոխտնօրեն, քաղաքագետ Սերգեյ Մինասյանի, ցույց տվեց, որ Ադրբեջանի նախագահ Իլհամ Ալիեւն, ընդհանուր առմամբ, հակված է փաստաթուղթ-հայտարարություն ստորագրել` սահմանային լարվածությունը թուլացնելու մասին: Մնացյալը` խնդրի խաղաղ կարգավորման պատրաստակամությունը, միջազգային հանրության ներգրավվածությունը, ՄԱԿ-ի բանաձեւերին հղումներն ու հակադարձումները, քաղաքագետը եվս համարում է «ընդհանուր» եւ արարողակարգային:
Մեր զրուցակցին, ի դեպ, այդքան էլ չի ոգեւորում լարվածությունը թուլացնելու մասին փաստաթուղթ ստորագրելու Ալիեւի պատրաստակամությունը: «Արդյոք դա երկրորդ Մայնդորֆ կլինի, թե՞ ավելի ձեւական` Կազան/Սոչի, դեռ պարզ չի»,- Aravot.am-ի հետ զրույցում իր տարակուսանքը բարձրաձայնեց Սերգեյ Մինասյանը:
Հիշեցնենք, որ Մայնդորֆում եւ Կազանում կայացած հերթական եռակողմ հանդիպումների ժամանակ, դեռ տարիներ առաջ, Ադրբեջանի նախագահը ստորագրեց սահմանային անվտանգության, այդ թվում նաեւ դիպուկահարներին ետ քաշելու մասին մի շարք դրույթներ ապահովող փաստաթղթերի տակ, սակայն, դրանից իրավիճակը չփոխվեց: Իրավիճակի փոփոխություններին չնպաստեցին նաեւ ԵԱՀԿ Մինսկի խմբի համանախագահների եւ խմբի անդամ երկրների նախագահների մի քանի հայտարարությունները:
Նելլի ԳՐԻԳՈՐՅԱՆ
Վերջապես պիտի հասկանալ, որ այս կոնֆլիկտի լուծման բանալին ԱՄՆ-ի ձեռքին է: Հայաստանը քծնում է սխալ կողմին. ռուսը միայն անբովանդակ PR-բլեֆներ է անում: