Հայաստանն ու Ադրբեջանը բարի կամք ունեն Լեռնային Ղարաբաղի հակամարտությունը խաղաղ ճանապարհով լուծելու համար, ասել է Ռուսաստանի նախագահ Վլադիմիր Պուտինը Սոչիում Հայաստանի և Ադրբեջանի նախագահների հետ եռակողմ հանդիպման ժամանակ, հայտնում է «ՌԻԱ Նովոստի»-ն:
«Հաճույքով հայտարարում եմ, որ և Ադրբեջանի նախագահն է ուշադրություն հրավիրել խնդիրները խաղաղ ճանապարհով կարգավորելու վրա, և դուք (Հայաստանի նախագահ) նոր այդ մասին ասացիք», – ասել է Պուտինը՝ նշելով, որ բոլոր դժվարությունները հնարավոր է հաղթահարել, եթե բարի կամք կա:
«Ինձ թվում է, որ այդպիսի բարի կամք առկա է և ադրբեջանական ժողովրդի, և հայ ժողովրդի մոտ», – ասել է Պուտինը՝ ավելացնելով, որ Ղարաբաղի խնդիրը ժառանգություն է մնացել անցյալից՝ Խորհրդային միությունից և կոչ արել համբերություն, իմաստնություն և մեկը մյուսի նկատմամբ հարգանք ցուցաբերել խնդրի լուծմանը հասնելու համար:
ՌԴ նախագահը անդրադարձել է նաև նախօրեին Սերժ Սարգսյանի և Իլհամ Ալիևի հետ կայացած առանձին հանդիպումներին. «Փառք աստծո, մենք երեկ երեկոյան չէինք կենտրոնացել գործնական հարցերի վրա: Սակայն տարբեր թեմաների մասին խոսելու հնարավորություն կար: Ըստ իս, դա որոշակի մթնոլորտ է ստեղծում, որպեսզի անկեղծորեն խոսվի ամենադժվար, ծանր հարցերի մասին, որոնք կապված են տարածաշրջանային խնդիրների կարգավորման հետ», – ասել է նա:
Կարդացեք նաև
Պատրաստեց Հովհաննես ԻՇԽԱՆՅԱՆԸ
