Վերջին շրջանում ղարաբաղա-ադրբեջանական ուժերի շփման գծում և հայ-ադրբեջանական պետական սահմանին տիրող լարված իրավիճակը ոտքի է հանել նաեւ վանաձորցիներին:
Թեեւ ՀՀ վարչապետ Հովիկ Աբրահամյանը օրերս Վանաձոր այցի ընթացքում լրագրողների հետ զրույցում համոզմունք հայտնեց, որ լարվածությունը գնալով կթուլանա, այնուամենայնիվ, Վանաձորի «Նժդեհ» աշխարհազորը գլխավորությամբ հրամանատար, գեներալ-լեյտենանտ Արշալույս Փայտյանի, տարածած հայտարարության մեջ պատրաստակամություն է հայտնում իր խորհուրդներով և գործողություններով օգնելու սահմանին կանգնած զինվորին:
«Արդեն որերորդ անգամ թշնամին, իրեն հատուկ նենգությամբ դրժելով խոստումը, որը հաստատված է միջազգային փաստաթղթերում դրված իր ստորագրությամբ, սահմանախախտ խարդավանքով փորձում է խուժել մեր խաղաղ կյանք՝ վտանգելով մեր Հայրենիքի անդորրը։ Փառք Հայոց բանակին, որ մեծ զգոնությամբ իր հսկողության տակ առած լինելով երկրի պաշտպանությունը՝ արժանի հակահարված է տալիս՝ ետ շպրտելով ու մեծ կորուստներ պատճառելով ոսոխին։
Վանաձորի «Նժդեհ» աշխարհազորային ջոկատը, որ կազմավորվել է 80-ականների վերջին և Անկախության բանակի դրոշի ներքո իր արժանի մասնակցությունը բերել Արցախյան հերոսամարտին, չի կարող անտարբերությամբ նայել թշնամական հարձակումներին, մանավանդ երբ այսօր էլ մի քանի մատաղ կյանք է զոհ գնացել Հայոց երկրի և Հայության պաշտպանության սուրբ գործին։ Չէ՞ որ ժամանակին ձևավորված մեր և մեզ նման բազմաթիվ ջոկատների՝ անխուսափելի կորուստներով լեցուն պայքարը գալիք սերունդների ապահովության և անդորրի համար էր։
Կարդացեք նաև
Արդ՝ Վանաձորի «Նժդեհ» աշխարհազորը պատրաստակամ է՝ իր խրախուսալից և ոգեշունչ մասնակցությունը բերելու այս պայքարին ևս, որն անպայման կոգևորի մեր բանակի առյուծ զինվորներին, մեր խորհուրդներով և գործողություններով օգնելու թե ընդհանուր սուրբ գործին, թե հենց հայ զինվորների կյանքի պաշտպանությանը»,-ասված է հայտարարության մեջ:
Ջոկատն սպասում է ՀՀ եւ ԼՂՀ նախագահների պաշտոնական կարգադրությանը:
Անուշ ԲՈՒԼՂԱԴԱՐՅԱՆ
