Հրաչյա Սարգսյանի պաշտպան, ՀՀ փաստաբանների պալատի անդամ Ռուբեն Բալաբանյանի վերաքննիչ բողոքը մերժվել է:
Փաստաբանը խնդրել էր բեկանել Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճիռը, որով 6 տարվա ազատազրկման էր դատապարտվել «ՍՏՇ-Պիրամիդա» ընկերության տնօրեն Հրաչյա Սարգսյանը:
Նա մեղադրվել էր կեղծ ստորագրություններ կատարելու, ինչպես նաեւ խարդախության համար:
Հրաչյա Սարգսյանը 2006 թվականից աշխատացրել է «ՍՏՇ Պիրամիդա» ընկերությունը : Որպեսզի ընկերությունն աշխատացնի, Հրաչյա Սարգսյանը 4 դրվագով վարկ է վերցրել 50 հազար, 200 հազար, 360 հազար եւ 900 հազար դոլար գումար: Գործարքները կատարվել են ինչպես միշտ՝ «Արցախբանկում» եւ «ՎՏԲ բանկում»: Բաժնետերեր են եղել արտերկրի քաղաքացի Քրիստիան Զադիկյանը եւ Մուշեղ Օհանյանը` ՊՆ Սեյրան Օհանյանի հայրը:
Բողոքաբեր փաստաբանը նախորդ դատական նիստին հայտնել էր, որ ապացուցված չէ հանցակազմը, որ դատարանում պետք է արդարացվի Հրաչյա Սարգսյանը եւ նա երբեք գումար հափշտակելու նպատակ չի ունեցել:
Ըստ պաշտպանական կողմի, Մուշեղ Օհանյանին, Քրիստիան Զադիկյանին, եւ բանկին նյութական վնաս չի պատճառվել:
Կարդացեք նաև
Մեղադրանքի կողմը, մասնավորապես, տուժողի ներկայացուցիչը գտնում էր, որ Զադիկյանի պարտքը չպիտի լիներ ընդհանրապես, քանի որ «Պիրամիդան» աշխատել է շահույթով. «Երբ Ք. Զադիկյանը իմացել է 1 մլն դոլարի վարկ է վերցվում իր անունով՝ զարմացել է»:
Հրաչյան Սարգսյանի պաշտպանն ասաց, որ իր պաշտպանյալն այնքան է հուսահատված եւ չի հավատում արդարությանը, այդ իսկ պատճառով չեն բողոքարկի վերաքննիչ դատարանի որոշումը:
Ռուզան ՄԻՆԱՍՅԱՆ
