Չինաստանի Նանջինգ քաղաքում օգոստոսի 16-ից 28-ը կայանալիք պատանեկան ամառային 2-րդ օլիմպիական խաղերին նախապատրաստվող հայաստանցի բռնցքամարտիկներ, երիտասարդների աշխարհի չեմպիոն, 51 կգ քաշային Անուշ Գրիգորյանն ու նույն տարիքային խմբի աշխարհի առաջնության բրոնզե մեդալակիր, 81 կգ քաշային Նարեկ Մանասյանը բռնցքամարտի ֆեդերացիայի միջոցներով երիտասարդական հավաքականի ավագ մարզիչ Վազգեն Բադալյանի գլխավորությամբ այսօրվանից Վանաձորում վերջին ուսումնամարզական հավաքն են սկսել:
Վազգեն Բադալյանը Aravot.am-ին տեղեկացրեց, որ հրավիրել է նաեւ բռնցքամարտիկների անձնական մարզիչներ Խաչիկ Խաչատրյանին եւ Արշավիր Գրիգորյանին: «Սա Նանջինգից առաջ մեր հիմնական հավաքն է, որի ընթացքում աշխատելու ենք տեխնիկատակտիկական որակների զարգացման վրա: Բռնցքամարտիկների համար կազմակերպելու ենք նաեւ մրցումային գոտեմարտեր, որոնց համար հրավիրել ենք այնպիսի բռնցքամարտիկների, որոնք իրենց ֆիզիկական տվյալներով ու ոճով նման են Անուշի ու Նարեկի ապագա մրցակիցներին:
Սակայն այս հավաքում զերծ ենք մնալու նրանց ավելորդ բարձր արագություններ տալուց եւ ծանրաբեռնելուց, քանի որ դրանք Անուշին ու Նարեկին ավելի պետք կգան մրցավայրում: Ես արդեն պայմանավորվել եմ Ռուսաստանի, Բելառուսի, Ուզբեկստանի մարզիչների հետ` մինչեւ բռնցքամարտի մրցաշարի մեկնարկը Նանջինգում համատեղ մարզվելու համար», – ասաց Վազգեն Բադալյանը:
Աշոտ ՀԱԿՈԲՅԱՆ
