Տավուշի մարզի Մովսես գյուղում վերջին երկու օրում ադրբեջանական կողմից հնչած կրակոցները չեն դադարել:
Գյուղապետ Արարատ Ավալյանը Aravot.am-ին պատմեց, որ երեկ գիշերվանից կրակոցներն ավելի ուժգին են եղել ու մինչեւ լուսաբաց չեն դադարել: Նրա խոսքով, ադրբեջանական կողմի հարձակումները վերսկսվել են այսօր առավոտյան 9-ից:
Նա ասաց, որ գյուղում կրակոցներից հիմնականում վնասվել են տների տանիքներ, պատուհանների ապակիներն են կոտրվել, բայց մարդկային զոհեր կամ վիրավորներ չունեն:
Գյուղապետի խոսքով, գյուղացիները խուճապի չեն մատնվել, բայց գյուղում լարված մթնոլորտ է. «Ամեն պահի սպասում ենք իրավիճակի սրացման»:
Կարդացեք նաև
Մովսես գյուղը հենց սահմանի վրա է, բայց գյուղապետը ադրբեջանական հարձակումներից լուրջ մտավախություններ չունի. «Հայկական բանակը կատարում է իր պարտականությունները, իրավիճակը լարված է, բայց վերահսկելի»:
Գյուղապետը չի ցանկանում ադրբեջանցիների ակտիվ հարձակումները պայմանավորել պատերազմի վերսկսման հնարավոր վտանգի հետ. «Մեր գյուղի ուղղությամբ միշտ էլ կրակոցներ եղել են»:
Արփինե ՍԻՄՈՆՅԱՆ
