«Օրենքը վերաբերվում է հուլիսի 26-ից հետո խախտում կատարած վարորդներին»,- այսօր՝ օգոստոսի 4-ին, անդրադառնալով հուլիսի 26-ից ճանապարհային երթեւեկության խախտումների համար կիրառվող նոր տուգանքներին, հայտարարեց «Աքիլլես» ավտովարորդների պաշտպանության հասարակական կազմակերպության նախագահ Էդուարդ Հովհաննիսյանը:
Նրա խոսքերով՝ վարորդը, եթե ծանուցում է ստացել հուլիսի 26-ից հետո, պետք է դիմում գրի Ճանապարհային ոստիկանության պետի անունով՝ պահանջելով վերանայել որոշումը: Իսկ եթե այդ դիմումը մերժում ստանա, ըստ նրա՝ հետագայում կարելի է դիմել Վարչական դատարան: Պարոն Հովհաննիսյանը նշեց, որ իրենց հասարակական կազմակերպությանը դեռ ոչ ոք չի դիմել.
«Մեզ դեռ ոչ մեկ չի դիմել, ընդամենը հարց են տալիս՝ ի՞նչ կլինի: Եթե տեսախցիկներն ու արագաչափերն են ֆիքսում խախտումը, ապա վարորդները որոշումները ստանում են մինչեւ տասնվեց օր հետո, հետեւաբար՝ այսօր, վաղը, մյուս օրը նոր կստանանք բողոքները»:
Էդուարդ Հովհաննիսյանի պնդմամբ՝ վարորդները, որոնք նախկինում խախտել են եւ ստացել են որոշումը, եւս կարող են բողոքարկել դա Վարչական դատարանում եւ Ճանապարհային ոստիկանությունում, որպեսզի վերանայեն արդեն գործող օրենքը, որն ունի հետադարձ ուժ.
Կարդացեք նաև
«Մուծածները կարող են դիմել, հետ պահանջել այդ գումարը: Եթե վարորդը մուծել է, դա արդեն ի կատար է ածվել, բայց եթե դեռ չի մուծել եւ բողոքարկման մեջ է գտնվում կամ գործը ԴԱՀԿ-ում է, ուրեմն՝ կարող է բողոքարկել, որպեսզի վերանայեն որոշումը»:
Ամի ՉԻՉԱԿՅԱՆ
