Սեյրան Օհանյանի վկայությամբ՝ ադրբեջանական զինուժին արժանի հակահարված է տրվել
Օգոստոսի 3-ի երեկոյան վարչապետ Հովիկ Աբրահամյանը, պաշտպանության նախարար Սեյրան Օհանյանն այցելեցին Նոյեմբերյանի տարածաշրջանում տեղակայված զորամաս: Նրանց ուղեկցում էր 3-րդ բանակային կորպուսի հրամանատար Օնիկ Գասպարյանը: Վարչապետն ու պաշտպանության նախարարը Նոյեմբերյանի տարածաշրջան այցելեցին Վանաձորից, ուր մասնակցել էին Արցախում զոհված ավագ լեյտենանտ Զորիկ Գեւորգյանի հուղարկավորությանը: Բարձրաստիճան պաշտոնյաներին դիմավորեց Տավուշի մարզպետ Հովիկ Աբովյանը:
Նոյեմբերյանի զորամասում սահմանամերձ համայնքների ղեկավարների եւ զորամասի զինծառայողների հետ բացօթյա հանդիպման ժամանակ վարչապետ Հովիկ Աբրահամյանը հայտարարեց, որ կառավարության ուշադրության կենտրոնում են բանակը, սահմանապահ զինվորը: Ս. Օհանյանն ասաց, որ հայրենիքի պաշտպանության գործում դիրքապահ զինվորը եւ սահմանամերձ գյուղերի բնակիչները նույն հարթության վրա են, քանի որ սահմանապահ զինվորը իր թիկունքում զգում է սահմանագոտու բնակիչների աջակցությունը:
Տավուշի մարզի սահմանամերձ համայնքների ղեկավարները բարձրացրին սահմանամերձ գյուղերի բնակիչներին հուզող խնդիրներ: Վարչապետն ասաց, որ կառավարությունը 20 միլիոն դրամ է հատկացրել սահմանամերձ շեներում ադրբեջանական զինուժի գործողություններից պատճառված վնասների հետեւանքները հաղթահարելու համար: Հ. Աբրահամյանի խոսքերով՝ կառավարությունը մտադիր է ներկայացնել սահմանամերձ գյուղերում ստեղծված բիզնեսը հարկերից ազատելու օրինագիծ: Պառավաքարի գյուղապետ Ռոլանդ Մարգարյանը առաջարկեց, որ թույլատրվի մեքենաների երթեւեկը կիսակառույց, դեռեւս խճապատ, շրջանցիկ Պառավաքարր-Վազաշեն ճանապարհով:
Կարդացեք նաև
Վազաշենի գյուղապետ Լորիկ Բադիրյանը հարց բարձրացրեց, որպեսզի սահմանամերձ գյուղերի բնակիչներին բնական գազի եւ էլեկտրաէներգիայի վճարների զեղչեր արվեն: Վարչապետ Հովիկ Աբրահամյանն ասաց, որ միշտ չէ, որ ցանկություններն ու հնարավորությունները համընկնում են , կես կատակ, կես լուրջ ավելացնելով, որ սահմանամերձ 30 գյուղերի նման խնդիրները լուծելու համար կարող են ներգրավել Հայաստանի 30 օլիգարխների: Կոթիի գյուղապետ Ֆելիքս Մելիքյանը պաշտպանության նախարարին շնորհակալություն հայտնելով սահմանամերձ գյուղերի հանդեպ ուշադրության համար, ասաց,որ սահմանամերձ Կոթիում ավելացել է պայմանագրային զինծառայողների քանակը եւ հարցրեց, թե պայմանագրային զինծառայողների աշխատավարձն ավելանալո՞ւ է: Ս. Օհանյանն ասաց, որ հունվարից բարձրացել է զինվորականների աշխատավարձը պայմանագրային զինծառայողները սահմանները պաշտպանելու համար նաեւ հավելավճար են ստանում,առաջիկայում եւս պայմանագրային զինծառայողների աշխատավարձն ավելանալու է: Նախարարը հայտարարեց,որ հայկական զինուժը արժանի հակահարված է տվել նախահարձակ ադրբեջանական զինուժին, մեծ կորուստներ պատճառելով նրան:
Ոսկան ՍԱՐԳՍՅԱՆ
