«Ցեղակրոն» կուսակցության նախագահ Շանթ Հարությունյանի եւ նրա ընկերների գործով դատական նիստի ընթացքում այսօր հարցաքննվեց նաեւ Երեւանի փոխոստիկանապետ Վալերի Օսիպյանը:
Նրա հարցաքննությունն այս պահին ընդհատվեց Շանթ Հարությունյանի գոռգոռոցների պատճառով:
Շանթ Հարությունյանը ձայնը բարձրացրեց այն պահին, երբ պարոն Օսիպյանը քաղաքացիական համազգեստով ոստիկանների գործողությունների վերաբերյալ հարցերին էր պատասխանում: Նա ասաց, որ օպերատիվ աշխատողներին տրվող հրահանգները, նրանց աշխատանքները գաղտնի են, նրանք կողմնակի աշխատանք են տարել:
Ամբաստանյալներից Սեւակի հարցին, դուք անձամբ նրանց հրահանգավորվե՞լ եք, որ զգույշ լինեն, որովհետեւ երթի մասնակիցները կարող է նրանց պրովոկատորների տեղ դնեն, հարցն էլ շարունակեց ամբաստանյալ Վարդան Վարդանյանը, թե հրահանգավորել եք, որ ֆիզիկական շփման մեջ չմտնեն երթի մասնակիցների հետ:
Կարդացեք նաև
Պարոն Օսիպյանն ասաց՝ այո: Վարդան Վարդանյանն էլ հաջորդ հարցը տվեց՝ իսկ այդ դեպքում ինչո՞ ւ նրանք առաջինը հարձակվեցին երթի մասնակիցների վրա:
Պարոն Օսիպյանն էլ ասաց, որովհետեւ նկատել են, որ իրենց գործընկերների առողջությանը վտանգ է սպառնում կամ էլ ուրեմն մի բան եղել էր:
Միջամտեց Շանթ Հարությունյանը. «Օսիպյան,« ուրեմն մի բան եղել էր» ո՞րն է: Ուրեմն մի բան եղե՞լ էր, չէ՞, որ ես դուրս էի եկել»:
Դատարանը 30 րոպե ընդմիջում հայտարարեց:
Մինչ այդ պարոն Օսիպյանը պատմեց նոյեմբերի 5-ի դեպքերը: Մասնավորեցրեց այդ օրվա իր ու Շանթ Հարությունյանի առանձնազրույցները: Պատմեց, որ փորձել է տեղեկանալ նրա հետագա անելիքներին, բայց Հարությունյանն այդպես էլ կոնկրետ պատասխան չի տվել:
«Սպասողական մթնոլորտ էր, այդ ամենն ինձ անհանգստացրեց, կարգադրեցի հավելյալ ուժեր մոտենան Ազատության հրապարակ, տեղակայվեն հարակից վայրերում»,- հավելեց պարոն Օսիպյանը:
Փաստաբանի հարցին, թե ագրեսիվ մթնոլորտը նկատելով ու անհանգստանալով ինչու օրենքի համաձայն չի պահանջել երթի մասնակիցներից մահակները հանձնել, ասաց ինքը հավատացել է Շանթ Հարությունյանին, որը իր հետ առանձնազրույցում վստահեցրել է, որ ավելորդ բաներ նրանց կողմից չեն լինի:
Երեւանի փոխոստիկանապետը նաեւ ասաց, որ դեպքի օրը ինքը մարմնական վնասվածք չի ստացել, աչքերն են ցավացել, պայթյունները ոտքերի տակ են տեղի ունեցել:
Արփինե ՍԻՄՈՆՅԱՆ
