Արթուր Բունիաթյանը համարում է, որ ադեկվատ հարվածները պետք է հուժկու լինեն
«Սահմանում տեղի ունեցող իրավիճակներն ունեն իրենց տրամաբանական պատճառներն ու դրդապատճառներն»,- այսօր՝ օգոստոսի 2-ին, «Երկու երես» մամլո ակումբում լրագրողների հետ հանդիպման ընթացքում, անդրադառնալով սահմանում տեղի ունեցող իրավիճակին, հայտարարեց Ադրբեջանահայերի համագումարի համանախագահ Արարատ Ծատուրյանը:
Նրա խոսքերով՝ հարցն ունի քաղաքական ենթատեքստ եւ հասարակության եւ իշխանությունների միջեւ ձեւավորված անդունդը եւ համատեղ անվտանգ ծրագրերի բացակայությունը առիթ է տալիս ադրբեջանական կողմին կատարել նման գործողություններ: Նա նշեց, որ իրենք առաջարկել են ստեղծել սահմանամերձ գյուղերի բնակիչներից կազմված արագ արձագանքման խմբեր, որոնք նման իրավիճակներում շատ արագ կկարողանան արձագանքել եւ կատարել առաջին քայլերը, մինչեւ համապատասխան մարմինները կիրականացնեն իրենց գործողությունները: Սակայն Պաշտպանության նախարարությունը մերժել է իրենց առաջարկը, իսկ նախագահ Սերժ Սարգսյանը մեկ անգամ չէ, որ հայտարարել է, որ դեմ է այդպիսի խմբերի ստեղծմանը.
«Արագ արձագանքման խումբը պատերազմական փորձ ունեցող հիմնականում տղաներից է կազմված, որոնց զենք կրելու իրավունք է տրվում եւ այդ զենքը անմիջապես գտնվում է նրանց հսկողության տակ: Համապատասխան ստորաբաժանման հրամանատարը կամ պատասխանատուն՝ անձնական պատասխանատվությամբ կարողանում է զենքեր բաժանել: Այսինքն՝ այն մտավախությունը, որ զենքը կարող է կիրառվել, օրինակ՝ կենցաղային վեճերի ժամանակ, միանշանակ բացառվում է»:
Կարդացեք նաև
Հետախույզ վետերանների միության անդամ Արթուր Բունիաթյանն էլ հայտարարեց, որ այստեղ պետք է զսպանակի օրենքը գործի.
«Միանշանակ ադեկվատ հարվածները պետք է շատ հուժկու լինեն: Այնպիսի հարված պետք է լինի, որ ադրբեջանցին հարյուր տարի մոռանա Հայաստանի ուղղությունը»:
Ամի ՉԻՉԱԿՅԱՆ
