Ինչպես արդեն տեղեկացրել ենք, այսօր էլեկտրաէներգիայի սակագնի թանկացման դեմ երթին մասնակցում էր Երևանի ավագանու «Բարև Երևան» խմբակցության անդամ Անահիտ Բախշյանը:
«Առավոտը» հետաքրքրվեց նրանքից՝ արդյո՞ք կատարել է երթի պահանջներից մեկը, այսինքն՝ անջատե՞լ է իր տան հոսանքը. «Քանի որ ես մենակ եմ ապրում, հոսանքն անջատել եմ և նոր եկել մոմերով երթի: Ցավոք, տուն գնալուն պես և հաջորդ օրերին ստիպված եմ օգտվել էլեկտրաէներգիայից: Բայց խոստանում եմ, որ մինչև հարցի լուծումը ամեն երեկո մեկ ժամով անջատելու եմ հոսանքը: Իսկ ամսի 6-ից 10 օր շարունակ տանս լույսերն անջատված են լինելու, քանի որ բացակայելու եմ քաղաքից»,-ասաց նա և հավելեց. «Եթե այս մասնակիցների թվով մարդիկ անջատեն իրենց տան լույսը, դրանով միայն իրենց օգուտ կտան՝ խնայողություններ անելով: Սա հարցի լուծում չէ, պետք է այլ տարբերակ գտնել ՝ բացատրելու համար Հանրային խորհրդին, որ նա կոչված է պաշտպանելու հանրային շահը և ոչ թե «Հայաստանի էլեկտրական ցանցերի» և տարբեր ընկերությունների»:
Ըստ Ա. Բախշյանի՝ նվազագույնը, որ Հանրային խորհուրդը պետք է աներ, դա հստակեցնել էր, թե ինչու են թանկացնում էլեկտրաէներգիան: «Ասում են, թե պարտքեր ունեն, մինչդեռ ժողովրդի ստացած աշխատավարձերի և թոշակի համեմատ հոսանքի գները չափազանց թանկ են: ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանն էլ մի 2 օր առաջ ասաց, թե այս վիճակը «ՀԷՑ»-ի փնթի ղեկավարման արդյունքն է, իսկ ինչո՞ւ հոսանքի թանկացման օրը նա չասաց, որ փնթի եք աշխատում, գնացեք լավ կառավարեք»:
Իսկ այն հարցին, արդյո՞ք ուշացած չի համարում մոմերով բողոքի երթը հենց այն օրը, երբ ուժի մեջ է դրվում Հանրային ծառայությունները կարգավորող հանձնաժողովի որոշումը, տիկին Բախշյանը պատասխանեց. «Սա ևս պայքարի ձև է: Եթե մեր հասարակության յուրաքանչյուր ընտանիքում հոսանքն այսօր թանկանում է, իսկ ամեն մի մարդ մտահոգվում է, թե ինչպես է վճարելու, պետք է գար այստեղ, Երևանի կեսը պետք է այստեղ լիներ»:
Կարդացեք նաև
Նազենի Բաղդասարյան
