Վրացական «Ռուսթավի 2» հեռուստատեսության լրագրող Դավիթ Կակուլիան Ուկրաինայի դեպքերը լուսաբանել է տեղում. եղել է եւ Ղրիմում, եւ Դոնեցկում, եւ, բնականաբար, Կիեւում: Նրան Յանուկովիչի ժամանակ «պերսոնա նոն գրատա» էին հայտարարել, արգելվել էր նրա մուտքը Ուկրաինա: Սակայն Յանուկովիչի հեռանալուց հետո նա շարունակեց իր լրագրողական գործունեությունը:
Հայ, ադրբեջանցի եւ վրացի լրագրողներին օրերս Թբիլիսիում կայացած սիմպոզիումի ժամանակ իր փորձը ներկայացնելիս՝ Դավիթ Կակուլիան սկսեց գլխավորից. «Ես ձեզ ուղղակի խնդրում եմ, երբեք չմոռանաք ձեզ հետ վերցնել այս իրերը»՝ ցուցադրելով «press» նշագրությամբ ժիլետը, զրահաբաճկոնը, սաղավարտը եւ հակագազը՝ ասաց Դավիթ Կակուլիան:
Կարդացեք նաև
Նա նկատեց, որ այդ պարագաները քանիցս փրկել են իր կյանքը, թեեւ եղել է նաեւ մի ժամանակաշրջան, երբ Յանուկովիչի կողմնակիցները նշան էին բռնում հենց «մամուլ» նշագրությամբ դեղին ժիլետ հագածների վրա: «Ես Ուկրաինա գնացի նոյեմբերի սկզբին, երբ ամեն ինչ նոր էր սկսվում… Մարդիկ ուղղակի իրենց ուղին դեպի Եվրոպա էին տեսնում, ուզում էին գնալ այդ ուղով: Ամեն ինչ սկսվեց դրանից»:
Դ.Կակուլիան պատմեց Կիեւում ԿԳԲ-ի այցելությունների մասին, երբ իրենց փորձում «քշել» Ուկրաինայի մայրաքաղաքից, հիշեց, թե Ղրիմում ինչպես իրենց ռուս զինվորներից ազատեցին «Ռոյթերսի» լրագրողները, սակայն ամենավատը Դոնեցկում էր. «Սա միանգամայն այլ վիճակ էր: Երբ ես Դոնեցկում էի, ինձ թվում էր, որ ես Բիշքեկում եմ: Բիշքեկի դեպքերի ժամանակ ես այդ քաղաքում էի, լուսաբանում էի Ղրղըզստանի քաղաքացիական պատերազմը, երբ 147 մարդ զոհվեց: Եվ Դոնեցկում ես ինձ զգում էի ճիշտ այդպես: Անհասկանալի մարդիկ, անհասկանալի զինված խմբավորումներ, երբ չգիտես ով ո՞վ է, ի՞նչ է, ի՞նչ է անում եւ ինչու… »:
Դ. Կակուլիան պատմեց, որ իրենց բռնել են, ծեծել, անգամ փորձել են հրազենով սպանել. «Ես եղել եմ Աֆղանստանում, Իրաքում, Ղրղըզստանում… բայց ոչ մի տեղ այսքան բարդ իրավիճակ չի եղել, ինչպես Ուկրաինայում է հիմա: Որովհետեւ պարզ չի, թե ով ով է, ուղղակի զինված մարդիկ են, զինյալներ…»:
Եվ վերջին խորհուրդը, որ տվեց լրագրողներին «Ռուսթավի 2»-ի թղթակիցը՝ նման էքստրեմալ իրավիճակների համար, հետեւյալն էր՝ «ունեցեք հազար, երկու-երեք հազար կոնտակտ, երբեք չես իմանա, թե ով քեզ կօգնի, որտեղից կգա փրկությունը»:
Մելանյա ԲԱՐՍԵՂՅԱՆ
Էդ վրացի լրագրողը լավ կլինի, որ լուսաբանի Թբլիսիի Հայկական Եկեղեցում տեղի ունեցած դեպքերը: Իրենց դրել են քաղաքակիրթ ազգի տեղ, բայց նման բարբարոսություն միայն Աֆղանստանի թալիբները կարող էին իրեց թույլ տալ……
մի բան հասկացա մի կերպ, որ վրացին բան չի հասկացել, մեկ էլ զրահաբաճկոն շատ է սիրում