Արդեն 20 տարի օգոստոսի 1-ին Իջեւանի տարածաշրջանի Կիրանցից սերվածները, թողած իրենց առտնին գործերը, հավաքվում են՝ նշելու հայրենի գյուղի տոնը: Փոքր Կիրանցը հայ-ադրբեջանական հակամարտության տարիներին հերոսություն ցուցաբերեց: 1985 թվականին 260 բնակիչ ունեցող Կիրանց գյուղի 18 բնակիչ զոհվեց մերօրյա ազատամարտում:
Հիմա սահմանամերձ Կիրանցն ունի 340 բնակիչ : 2014թ. օգոստոսի 1-ին Կիրանց գյուղի տոնակատարության ժամանակ ելույթ ունեցան Իջեւանի մշակույթի տան գեղմասվար Գայանե Չապուխյանը, Կիրանցի գյուղապետ Հմայակ Նազարյանը, ՀՀ պաշտպանության նախարարության կողմից «Ծովակալ Իսակով» եւ «Հայրենիքին մատուցած ծառայությունների համար» մեդալներ հանձնվեցին Կիրանցի ազատամարտիկներին: Կիրանցից սերված, նշանավոր ռազմական փորձարկող- օդաչու Վալենտին Նազարյանի կողմից 2010թ. կառուցված մատուռում տեղի ունեցավ նրա թոռնիկի կնունքի արարողությունը:
Կարդացեք նաև
Այնուհետեւ տոնակատարությունը շարունակվեց Կիրանցի դպրոցի դահլիճում,ուր հանդիսավոր առիթով շնորհավորանքի խոսք ասացին երկրապահ կամավորականների միության Նոյեմբերյանի տարածաշրջանի միության նախագահ Ռաֆիկ Ասլանյանը (Մուրոն), Հայաստանի գրողների միության Տավուշի մարզային մասնաճյուղի ղեկավար Սամվել Բեգլարյանը, Վալենտին Նազարյանի ընկեր, տիեզերագնաց օդաչու,ԽՍՀՄ հերոս, ԽՍՀՄ վաստակավոր օդաչու-փորձարկող Ալեքսեյ Պետրովիչ Վոլկը:
Ոսկան ՍԱՐԳՍՅԱՆ
