Երեւանի ավագանու ընտրություններից առաջ երգիչ-երգահան Ռուբեն Հախվերդյանի հետ կապված մի տեսանյութ էր տարածվել համացանցում, որտեղ երգիչը հույս է հայտնում, որ «Բարգավաճը» պետք է հաղթի:
Ավելի ուշ Ռուբեն Հախվերդյանը հանդիպում ունեցավ Գագիկ Ծառուկյանի հետ եւ նրա հասցեին շատ ջերմ խոսքեր ասաց: Aravot.am-ի հետ զրույցում խոսելով այդ հանդիպման մասին՝ Ռուբեն Հախվերդյանը վստահեցրեց, որ դա իր քաղաքական հայացքների հետ կապ չունի. «Դե, սիրում է իմ երգերը, ասում ա՝ լսում եմ քո երգերը, իմ թոռներն էլ են լսում քո երգերը: Օգնեց ինձ: Թեեւ բավարար չի էդ օգնությունը, որովհետեւ երկու CD եմ սարքում: Մեկը ՝Վահագ Հայրապետյանի հետ գործիքավորող, մյուսը՝ Նարինե Զարիֆյանի հետ, որը իմ մանկական երգերի գործիքավորողն է»:
Մենք ճշտեցինք, այսինքն՝ Գագիկ Ծառուկյանի հետ հարաբերությունները Ձեր քաղաքական հայացքների հետ կապ չունե՞ն՝ նա պատասխանեց. «Բնավ կապ չունի: Նա բավականին մարդկանց օգնում է, շատ մարդկանց է օգնում: Հենց մենակ սպորտը, որ վերցնենք, դա արդեն մեծ բան է: Լսել եմ, որ բավականին ուսանողների էլ է ինքը օգնում ու դրա մասին չի էլ սիրում խոսել առանձնապես: Ինձ էլ օգնում ա, որովհետեւ մենք վաղուցվա ծանոթներ ենք»:
Հռիփսիմե ՋԵԲԵՋՅԱՆ
