ՀՀ-ում Առողջության իրավունքի պաշտպանության միջոցների հնարավոր զարգացումները բացահայտելու նպատակով ՀՔԱ Վանաձորի գրասենյակը «Իրավաբանների ընկերակցություն» կազմակերպության հետ համատեղ «Առողջության իրավունք. միջազգային չափանիշները եւ դրանց կիրառումը ներպետական մակարդակում» թեմայով դասընթաց էր կազմակերպել:
«Իրավաբանների ընկերակցություն» կազմակերպության իրավաբաններ Գաբրիել Արմաս-Կարդոնան եւ Կեյթ Բարթը Skype-ի միջոցով դասընթացի մասնակիցներին ներկայացրին Առողջության իրավունքի միջազգային ստանդարտների եւ համաշխարհային առողջության եւ մարդու իրավունքների տվյալների բազան:
Դասընթացի ընթացքում կազմակերպության իրավաբաններն իրենց հերթին ներկայացրին Առողջության իրավունքի պաշտպանության ներպետական միջոցները: Բացի այդ` նրանք խոսեցին ոլորտի վերաբերյալ ՀՔԱՎ-ի ձեռք բերած փորձից:
«Կազմակերպությունը բժշկական ոչ ճիշտ միջամտության արդյունքում մահացության գործերի շրջանակներում հիմնականում հանդիպում է այնպիսի խնդիրների, ինչպիսիք են քրեական գործով տուժողի իրավահաջորդ չներգրավելը: ՀՀ-ում նախաքննության մարմինը մեծամասամբ քրեական վարույթից տուժողի իրավահաջորդին դուրս է թողնում: Հաջորդ խնդիրը, որի հետ առնչվել ենք, փորձագիտական եզրակացություններն են: Առողջական վիճակի հետ կապված հիմնական ապացույցը, որը որ կարող է դառնալ մեղադրանքի հիմք, փորձագիտական եզրակացություններն են, որոնք իրարամերժ, իրար հակասող եզրակացություններ են, ու դա առիթ է տալիս պնդելու, որ ՀՀ-ում փորձաքննությունները կատարվում են շատ թերի եւ ցուցումներով»,-Aravot.am-ի հետ զրույցում տեղեկացնում է ՀՔԱՎ-ի իրավաբան Արայիկ Զալյանը:
Կարդացեք նաև
Վիճակագրությունը փաստում է` 2013 թվականին ՀՀ-ում 0-4 տարեկան 463 երեխաների մահվան դեպք է գրանցվել, 2012-ին այդ թիվը 506 է եղել, 2011-ին` 594:
2013թ. գրանցվել է մայրական մահացության 8 դեպք:
Թե այս դեպքերից քանիսն են բժշկական ոչ ճիշտ միջամտության արդյունք, անորոշ է:
Անուշ ԲՈՒԼՂԱԴԱՐՅԱՆ
