Շանթ Հարությունյանի եւ ընկերների գործով դատական նիստին այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում սկսվել է նոյեմբերի 5-ի դեպքերին վկա ոստիկանների հարցաքննությունը:
Գործով վկա ոստիկան Արտակ Ավետիսյանի պատմելով, ծառայության շրջանակներում լսել է գոռգոռոցներ ու պայթյուններ: Ցուցարարներին մոտենալիս նկատել է ճանապարհային ոստիկանության մեքենա, որի հետեւում խառնաշփոթ էր, մարդիկ գոռգոռում էին: Հետո նկատել է, որ քաղաքացիական հագուստով անձի վրա են հարձակվել քանի ցուցարար ու հարվածել փայտերով, ոտքերով ու ձեռքերով: Ըստ վկայի, քաղաքացիական հագուստով անձը շարունակ գոռում էր, որ ոստիկան է: Հետո ինքը լսել է, թե ինչպես մի մարդ գոռաց` միլիցա է, խփեք:
Ոստիկանի պատմելով, հարվածող ցուցարարների մեջ էր զինվորական համազգեստով մի մարդ: Հետագայում իրենք պարզել են, որ այդ մարդը ամբաստանյալներից Վարդան Վարդանյանն է:
Վկան նաեւ պատմեց, որ նկատել է նաեւ սպորտային համազգեստով մի երիտասարդի, որը ձեռքի բռունցքի չափով իրեր էր նետում ոստիկանների ոտքերի տակ, որոնք պայթում էին: Նրա խոսքով, պայթուցիկներից ծուխ ու կրակ էր դուրս գալիս:
Կարդացեք նաև
Ոստիկանը նաեւ պատմեց, որ դեպքի հաջորդ օրը իր գործընկերների հետ այցելել է իրենց գումարտակի հրամանատարին, որը որովայնի մասում վնասվածք էր ստացել ու գտնվում էր հիվանդանոցում: Այցելության ժամանակ ուսումնասիրել են համացանցում տեղադրված տեսանյութերը, ցուցարարների գործողությունները, պարզել են, որ պայթուցիկներ նետող սպորտային համազգեստով անձն էլ Ավետիս Ավետիսյանն էր:
Հարցին, թե հետագայում պարզեցի՞ն՝ ով էր քաղաքացիական հագուստով ոստիկանը, ասաց մինչ այդ է ճանաչել:
Հարցին՝ ասեք նրա անուն, ազգանունը, պատասխանեց միայն դեմքով է ճանաչում: Հարցին, թե պահանջե՞լ եք փաստաթուղթ, ասաց՝ ոչ, հետագայում էլ չի ճշտել, որովհետեւ ոստիկանական այլ ծառայություններից է ճանաչել նրան:
«Ցեղակրոն» կուսակցության նախագահ Շանթ Հարությունյանը բարկացավ ու սկսեց գոռալ ոստիկանի վրա. «Մանթո՞ ես , որ միլիցա ենք խփել: Լավ ենք արել, տփել ենք, բախտդ բերել է, որ քեզ չենք տփել: Րոպեն մեկ ասում է՝ ասում էին, միլիցա է տփեք, տո ոստիկանն ի՞նչ իրավունք ուներ քաղաքացիական հագուստով գար: Դեմագոգություն է անում, ասեք՝ չանի»:
Դատավորի միջամտությունից հետո հարցաքննությունը շարունակվեց: Հարցին՝ իրենից ինչ հեռավորության վրա են պայթյուններ տեղի ունեցել, ոստիկանն ասաց՝ չի հասկանում հարցը: Ու մինչեւ վերջ էլ չասաց՝ ինչ հեռավորության վրա: Միայն ասաց, որ պայթուցիկներից աչքերն էր մրմռում, հազ էր առաջացնում:
Քաղաքացիական հագուստով ոստիկանին վերաբերող մեկ այլ հարցին ի պատասխան, ոստիկանը պատմեց, որ հարվածների արդյունքում արյունոտվել էր նրա դեմքը, վայր է ընկել հոծ գծի եւ մայթի միջնամասում:
Այդ պահին Շանթ Հարությունյանը կանգնեց ու կրկին սկսեց գոռալ ոստիկանի վրա. «Տո դու ով ես, դու գիտես ՝ սուտ խոսալն ինչ է»:
Դատավորը ընդմիջեց դատական նիստը, հեռացրին Շանթ Հարությունյանին: Իսկ մինչ այդ էլ ոստիկանին վիրավորելու համար դատարանի որոշմամբ սանկցիա կիրառեց:
Արփինե ՍԻՄՈՆՅԱՆ
