Ադրբեջանական կողմն այսօր առավոտից ինտենսիվ գնդակոծում է Տավուշի մարզի Բերքաբեր գյուղը:
«Այս պահին էլ Բերքաբերի ուղղությամբ կրակահերթ է: Երեւի 5 րոպեն մեկ կրակ են արձակում: Մարդիկ տներից դուրս չեն գալիս, երեխաներին, հարսներին գյուղից հեռացրել են »,- Aravot.am-ին պատմեց Բերքաբերի գյուղապետ Արթուր Մադաթյանը:
Նրա պատմելով, կրակոցները հիմնականում գյուղ բերող միակ ճանապարհի ուղղությամբ են, դրանք հաճախակիանում են հատկապես մեքենաների անցուդարձի ժամանակ. «Իրավիճակը լարված է: Ամբողջ գիշեր շարունակել են գնդակոծել: Կրակոցները կպել են մի քանի տների պատերին , մարդիկ տներից դուրս չեն գալիս, նույնիսկ այգիներում աշխատելու չեն գնում»:
Պարոն Մադաթյանի խոսքով, կրակոցների արդյունքում այրվել են գյուղացիների խոտի դեզերը. «Լուրջ վնասներ կան, ձմռանը մնալու են առանց խոտի: Երեւի ստիպված լինեն անասուններն էլ վաճառեն»:
Կարդացեք նաև
Նա նաեւ ասաց, որ այսօր առավոտյան մարզպետը կրկին այցելել է իրենց գյուղ, ծանոթացել իրավիճակին. «Թող մեր գյուղի ժողովրդին մի քիչ մարդու տեղ դնեն, ոչ հող ունենք, ոչ` ջուր, ոչ `գազ ու աշխատատեղ: Մտածում ենք` Աստված չանի մեկիս կպնի ադրբեջանցու գնդակը, որովհետեւ չգիտենք ոնց ենք հանելու գյուղից, ճանապարհ չկա: Գոնե սարքեն, մի բան անեն: Հիմա կարող է վաղը զանգեք, էլ չկարողանամ ձեզ հետ խոսել, գնդակն ինձ կպած լինի»:
Մեր հարցին` այսօր մարզպետին ներկայացրե՞լ եք գյուղի խնդիրները, ասաց` այո. «Մարզպետին ներկայացրել ենք, բայց կարեւորը մարզպետը չէ, կարեւորը վերեւներն են: Վերեւներից պետք է ասեն»:
Բերքաբերը ադրբեջանական սահմանից 400 մ հեռավորության վրա է գտնվում: Հիշեցնենք, որ Բերքաբերն արդեն երկու օր է գնդակոծվում է ադրբեջանական կողմից:
Արփինե ՍԻՄՈՆՅԱՆ
