Գուրջիևի անվան ժող. Նվագարանների համույթը հուլիսին հերթական անգամ մեծ հաջողություններով վերադարձավ Գերմանիայից, որտեղ մասնակցեց Ռուդոլշտատ փառատոնին: Վերջինս ժողովրդական երաժշտության Եվրոպայի ամենահայտնի փառատոններից է:
Տարբեր երկրներից ժամանած մասնակիցներին լսելու են գալիս ավելի քան 80 000 մարդ, իսկ մասնակից խմբերի թիվը գերազանցում է 100-ը:
Գուրջիևի ժողնվագարանների համույթի մասնակցության շնորհիվ Ռուդոլշտատ քաղաքում բարձրացվել է նաև Հայաստանի դրոշը, իսկ համերգները անցել են լեփ-լեցուն սրահներում:
Գուրջիև համույթի ելույթը մեծ հետաքրքրություն է առաջացրել, ինչի շնորհիվ հարյուր խմբերից ընտրվել է Բավարիան ռադիոյի կողմից հեռարձակվելու համար:
Համույթի հաջողությունները, սակայն, ավելի վաղ են սկսվել:
Հունիսին համույթը, «Հերես» կազմակերպության հետ համագործակցելով, ելույթ էր ունեցել Շվեյցարիայի Ցյուրիխ քաղաքի «Կոնգրեսհաուզ»-ում և Շավհաուզենի քաղաքապետարանում:
Իսկ դեռևս մայիս ամսին խմբի գեղարվեստական ղեկավար Լևոն Իսկենեանը, դաշնակահարուհի Լուսինե Գրիգորյանը և դուդուկահար Էմմանուել Հովհաննիսյանը համերգներով հանդես եկան Ավստրալիայի Սիդնեյ և Քեմբերա քաղաքներում՝ ներկայացնելով Գուրջիևի և Կոմիտասի ստեղծագործությունները:
Նույն ժամանակաշրջանում նրանք նաև Սիդնեյի կոնսերվատորիայում ուսանողների հետ վարպետության դասեր են անցկացրել՝ ներկայացնելով և տարածելով Կոմիտասի երաժշտությունը, նաև Քենբերայի հանրահայտ «Ալբերտ հոլլ» սրահում հնչեցրել են Կոմիտասի երաժշտությունը, այնուհետև համույթը ելույթ է ունեցել Լիսբոնի Գյուլբեկյան կենտրոնի սրահում՝ լինելով առաջին խումբը Հայաստանից, որ ելույթ է ունենում այս սրահում:
Այս պահին համույթը շարունակում է իր աշխատանքները, և առաջիկայում հայ երաժիշտները կմասնակցեն մեկ այլ երաժշտական ծրագրի՝ շարունակելով ներկայացնել հայկական երաժշտությունը միջազգային բեմերում:
Գուրջիև երաժշտական համույթ
